കോന്നി : കോന്നി ഗ്രാമപഞ്ചായത്തിലെ പന്ത്രണ്ടാം വാർഡായ എലിയറയ്ക്കലിൽ വാഹനം ഇടിച്ചു ചത്ത തെരുവ് നായയുടെ ജഡം മറവ് ചെയ്യാൻ കോന്നി ഗ്രാമ പഞ്ചായത്ത് അധികൃതർ തയ്യാറായില്ല എന്ന് നാട്ടുകാരുടെ പരാതി. എലിയറക്കലിലെ വ്യാപാര സ്ഥാപനങ്ങൾക്ക് മുൻപിലായാണ് സംസ്ഥാന പാതയിൽ തെരുവ് നായ വാഹനം ഇടിച്ചു ചത്തത്. വാഹനം കയറി ഇറങ്ങി വികൃത്യമായ ജഡം നടുറോഡിൽ കിടന്നിട്ടും ആരും തിരിഞ്ഞു നോക്കിയില്ല എന്നാണ് നാട്ടുകാരുടെ പരാതി. ജന പ്രതിനിധികളെ വിവരം അറിയിച്ചിട്ടും ആരും എത്തിയില്ല എന്നും പറയുന്നു.
സഹികെട്ട വ്യാപാര സ്ഥാപനത്തിലെ തൊഴിലാളികൾ തന്നെ ജഡം റോഡിൽ നിന്ന് മാറ്റുകയായിരുന്നു. മാസങ്ങൾക്കു മുൻപാണ് ഇതിന് സമീപ പ്രദേശമായ പൂവൻപാറയിൽ തെരുവ് നായ വാഹനം കയറി ചത്ത് വഴിയിൽ കിടന്ന് ദുർഗന്ധം വമിക്കാൻ തുടങ്ങിയിട്ടും കോന്നി പഞ്ചായത്ത് അധികൃതർ തിരിഞ്ഞു നോക്കാതെ മാറി നിന്നത് എന്നും ആക്ഷേപമുണ്ട്. മഴക്കാലം ആരംഭിച്ച് രോഗങ്ങൾ വർധിച്ച സാഹചര്യത്തിൽ ആണ് കോന്നി ഗ്രാമ പഞ്ചായത്തിന്റെ ഈ അനാസ്ഥ.
