കോന്നി : കോന്നി – തണ്ണിത്തോട് ഗ്രാമപഞ്ചായത്തിൻ്റെ വിവിധ കേന്ദ്രങ്ങളിൽ അനധികൃത കശാപ്പുകൾ വർധിക്കുന്നു. മലയോര മേഖലയുടെ പല ഭാഗത്തും ഇത്തരത്തിൽ കശാപ്പുകൾ നടക്കുന്നുണ്ടെന്നാണ് സൂചന. വീടുകളിലും മറ്റും വളർത്തുന്ന കന്നുകാലികളെ കുറച്ച്പേർ ചേർന്ന് വിലയ്ക്കുവാങ്ങി യാതൊരു മാനദണ്ഡവും സ്വീകരിക്കാതെ കശാപ്പ് ചെയ്യുന്ന രീതിയാണ് ഇപ്പോൾ വർധിച്ച് വരുന്നത്.
കടകളിൽ കശാപ്പ് ചെയ്യുന്ന ആടുമാടുകളെ പരിശോധനയ്ക്ക് ശേഷം മാത്രമേ കശാപ്പ് ചെയ്യാവൂ എന്ന നിയമം നിലനിൽക്കേയാണ് ഇത്തരം പ്രവർത്തനങ്ങൾ. പൊതുജനാരോഗ്യ നിയമ പ്രകാരം കേസെടുക്കാവുന്ന കുറ്റകൃത്യമാണിതെന്ന് ആരോഗ്യ വകുപ്പ് അധികൃതർ പറയുന്നു. എന്നാൽ പൊതുജനങ്ങളിൽ നിന്ന് രേഖാമൂലമൂലമുള്ള പരാതികൾ ലഭിക്കാത്തത് അധികൃതർക്ക് നിയമ നടപടി സ്വീകരിക്കുന്നതിന് തടസമാകുന്നുണ്ട്. എങ്കിലും ശക്തമായ രീതിയിൽ തണ്ണിത്തോട് ആരോഗ്യ വകുപ്പ് അധികൃതർ ഇതിനെതിരെ പ്രതികരിക്കുകയും ജനങ്ങൾക്ക് മുന്നറിയിപ്പും ബോധവത്കരണവും നൽകുന്നുണ്ട്. പോലീസിൻ്റെ ഭാഗത്ത് നിന്നും ഈ വിഷയത്തിൽ അടിയന്തിര ഇടപെടൽ ഉണ്ടാകണമെന്നും ആവശ്യമുയരുന്നു.
