പത്തനംതിട്ട : കേരളത്തിന്റെ വികസനക്കുതിപ്പിനൊപ്പം കോന്നിയും കുതിക്കുകയാണെന്ന് തദ്ദേശസ്വയംഭരണ മന്ത്രി എംബി രാജേഷ് പറഞ്ഞു. സീതത്തോട് ഗുരുനാഥന്മണ്ണ് റോഡ് ഉദ്ഘാടനം ഓണ്ലൈനായി നിര്വഹിച്ച് സംസാരിക്കുകയായിരുന്നു മന്ത്രി. കേരളത്തില് വിപുലമായ പശ്ചാത്തല സൗകര്യങ്ങള് വികസിക്കുകയാണ്. 45 മീറ്റര് വീതിയില് ദേശീയ പാതയുടെ പൂര്ത്തീകരണത്തോടെ കേരളത്തിന്റെ മുഖച്ഛായ മാറും. 5580 കോടി രൂപ കിഫ്ബിയില് നിന്ന് ലഭ്യമാക്കിക്കൊണ്ടാണ് ദേശീയ പാതയുടെ പൂര്ത്തീകരണം നടത്തുക. ഇന്ത്യയില് ആദ്യമായി ആണ് ഒരു സംസ്ഥാനം ദേശീയ പാത നിര്മാണച്ചെലവ് പങ്കിടുന്നതെന്നും മലയോര ഹൈവേ, തീരദേശ ഹൈവേ എന്നിവ കൂടി പൂര്ത്തിയാകുമ്പോള് കേരളം മറ്റൊരു ഘട്ടത്തിലേക്ക് സഞ്ചരിക്കുമെന്നും മന്ത്രി പറഞ്ഞു.
ഡിപിആര് ന്റെ അടിസ്ഥാനത്തില് ഏഴ് കിലോ മീറ്റര് ദൂരത്തില് ഉന്നത നിലവാരത്തിലാണ് റോഡ് നിര്മ്മിക്കുക . നിലവിലുള്ള മൂന്ന് മീറ്റര് റോഡ് 5.5 മീറ്റര് വീതിയില് ബിഎം ആന്ഡ് ബിസി സാങ്കേതിക വിദ്യയില് ടാര് ചെയ്ത് സംരക്ഷണ ഭിത്തിയും ഓടയും നിര്മ്മിച്ചും പുതിയ കലുങ്കിന്റെ നിര്മ്മാണവും നിലവിലുള്ള കലുങ്ക് മെച്ചപ്പെടുത്തുകയും ട്രാഫിക് സുരക്ഷാ പ്രവൃത്തികള് ഏറ്റെടുത്തുകൊണ്ടും ആണ് റോഡുകള് ഉന്നത നിലവാരത്തില് നിര്മ്മിക്കുന്നത്. അഡ്വ . കെ യു ജനീഷ് കുമാര് അധ്യക്ഷത വഹിച്ച ചടങ്ങില് അഡ്വ. പ്രമോദ് നാരായണ് എം എല് എ , ജില്ലാ കളക്ടര് എ.ഷിബു തുടങ്ങിയവര് മുഖ്യപ്രഭാഷണം നടത്തി.
റാന്നി ബ്ലോക്ക് പഞ്ചായത്ത് പ്രസിഡന്റ് കെ എസ് ഗോപി, പഞ്ചായത്ത് പ്രസിഡന്റ് അസോ.ജില്ലാ പ്രസിഡന്റ് പി എസ് മോഹനന്, വൈസ് പ്രസിഡന്റ് പി എസ് സുജ, ജില്ലാ പഞ്ചായത്തംഗം ലേഖ സുരേഷ്, സീതത്തോട് ഗ്രാമപഞ്ചായത്ത് പ്രസിഡന്റ് പി ആര് പ്രമോദ്, കോന്നി ബ്ലോക്ക് പഞ്ചായത്ത് വികസനകാര്യസ്റ്റാന്ഡിംഗ് കമ്മിറ്റി ചെയര്മാന് ജോബി ടി ഈശോ, സീതത്തോട് ഗ്രാമപഞ്ചായത്ത് ക്ഷേമകാര്യസ്റ്റാന്ഡിംഗ് കമ്മിറ്റി ചെയര്പേഴ്സണ് ശ്രീലജ അനില്, ആരോഗ്യസ്റ്റാന്ഡിംഗ് കമ്മിറ്റി ചെയര്മാന് പി എം മനോജ്, ചലചിത്ര താരങ്ങളായ സുബീഷ് സുധി, ദര്ശന എസ് നായര് , ത്രിതലപഞ്ചായത്തംഗങ്ങള്, രാഷ്ട്രീയ പാര്ട്ടി പ്രതിനിധികള്, സാമുദായിക നേതാക്കള് തുടങ്ങിയവര് പങ്കെടുത്തു.
