കോന്നി : കോന്നി കല്ലേലി ഊരാളി അപ്പൂപ്പന്കാവിലെ പത്താമുദയ മഹോത്സവവുമായി ബന്ധപ്പെട്ട എട്ടാം ഉത്സവം പത്തനംതിട്ട ജില്ലാ പഞ്ചായത്ത് അംഗം എസ്.സന്തോഷ് കുമാര് ഭദ്രദീപം തെളിയിച്ച് ഉത്ഘാടനം ചെയതു. കാവ് പ്രസിഡന്റ് സി.വി ശാന്തകുമാര് അധ്യക്ഷത വഹിച്ചു. കോന്നി ഗ്രാമ പഞ്ചായത്ത് പ്രസിഡന്റ് റോജി എബ്രഹാം, വനം വകുപ്പ് ജീവനക്കാരന് ഷൈന്, സാമൂഹിക പ്രവര്ത്തകന് സുബിന്, സെക്രട്ടറി സലിം കുമാര് കല്ലേലി, അഡ്മിനിസ്ട്രെട്ടീവ് ഓഫീസര് സാബു കുരുംബകര എന്നിവര് സംസാരിച്ചു.
പത്താമുദയവുമായി ബന്ധപ്പെട്ട പത്ത് ദിവസവും പുലര്ച്ചെ നാല് മണി മുതല് മലയുണര്ത്തല്, കാവുണര്ത്തല് ആചാരങ്ങള് ആരംഭിക്കും. 8.30 മുതല് ഉപ സ്വരൂപ പൂജകള്, വാനരയൂട്ട്, മീനൂട്ട്, പ്രഭാത പൂജ, നിത്യ അന്നദാനം, ഊട്ടുപൂജ, സന്ധ്യാ വന്ദനം, ദീപ നമസ്ക്കാരം, ദീപക്കാഴ്ച എന്നിവയും നടക്കും. പത്താമുദയ ദിവസമായ ഏപ്രില് 23 ന് രാവിലെ 6 മണിക്ക് 1001 കരിക്ക് പടേനി സമര്പ്പിക്കും. രാവിലെ 9 മണിക്ക് പ്രഭാത പൂജയോട് അനുബന്ധിച്ച് പുഷ്പാഭിഷേകം നടക്കും. തുടര്ന്ന് ചരിത്ര പ്രസിദ്ധമായ ആദിത്യ പൊങ്കാല സിനിമ താരങ്ങളായ പ്രീയങ്ക നായര്, സീമ ജി.നായര്, ഗായിക അഞ്ജന കടമ്പനാട് എന്നിവര് ചേര്ന്ന് ഭദ്ര ദീപം തെളിയിക്കും.
