കോന്നി: കോന്നി കരിയാട്ടം ടൂറിസം രംഗത്ത് കോന്നിയ്ക്ക് കരുത്താകുമെന്ന് ഭക്ഷ്യ സിവിൽ സപ്ലൈസ് വകുപ്പ് മന്ത്രി ജി.ആർ.അനിൽ പറഞ്ഞു. കോന്നി കരിയാട്ടത്തിൻ്റെ ഭാഗമായുള്ള ടൂറിസം – വ്യവസായ – കാർഷിക പ്രദർശന വിപണനമേള ഉദ്ഘാടനം ചെയ്യുകയായിരുന്നു അദ്ദേഹം. ടൂറിസം വികസനം മുൻനിർത്തി ഉതവലിയ ഒരു ആഘോഷം കേരളത്തിൽ തന്നെ അപൂർവ്വമാണ്. ടൂറിസം സാധ്യതകൾ വിപുലമാക്കാനും ചെറുകിട സംരഭകർക്കും കുടുംബശ്രീ ഉൾപ്പടെയുള്ള സംവിധാനങ്ങൾക്കും മേള വലിയ മുന്നേറ്റമാകുമെന്നും അദ്ദേഹം പറഞ്ഞു. അഡ്വ.കെ.യു.ജനീഷ് കുമാർ എം.എൽ.എ അദ്ധ്യക്ഷത വഹിച്ചു. ഡെപ്യൂട്ടി സ്പീക്കർ ചിറ്റയം ഗോപകുമാർ മുഖ്യാതിഥി ആയിരുന്നു. പ്രദർശന-വിപണന മേളയ്ക്കായി കെ.എസ്.ആർ.ടി.സി മൈതാനിയിൽ വിപുലമായ സംവിധാനമാണ് ഒരുക്കിയിരിക്കുന്നത്. മേളയിൽ 200 ൽ അധികം സ്റ്റാളുകളാണ് ഉണ്ടാവുക. ആധുനിക നിലവാരത്തിലാണ് സ്റ്റാളുകൾ തയ്യാറാക്കിയിരിക്കുന്നത്.
വിവിധ സർക്കാർ വകുപ്പുകളുടെ സ്റ്റാളുകൾ, കോന്നിയുടെ ടൂറിസം സാധ്യതകളും – മനോഹാരിതയും ജനങ്ങൾക്ക് ബോധ്യമാക്കുന്ന പ്രദർശനം, കാർഷിക- വ്യവസായ-വനം വകുപ്പുകളുടെ സ്റ്റാളുകൾ, സംസ്ഥാനത്തെ വിവിധ പൊതുമേഖലാ – സ്വകാര്യ മേഖലാ വ്യവസായശാലകൾ, ജ്വല്ലറികൾ, ചെറുകിട സംരംഭകർ, കുടുംബശ്രീ, ഖാദി, മോട്ടോർ വാഹന രംഗത്തെ വിവിധ കമ്പനികൾ, ഇൻഷ്വറൻസ് കമ്പനികൾ തുടങ്ങിയവരും പ്രദർശനത്തിൽ പങ്കെടുക്കുന്നുണ്ട്. വിവിധ ഫലവർഗ്ഗങ്ങളുടെ തൈകൾ, അലങ്കാര ചെടികൾ തുടങ്ങിയവയുടെ വിപുലമായ ശേഖരം പ്രദർശന സ്ഥലത്ത് ഒരുക്കിയിട്ടുണ്ട്. സ്വാഗതസംഘം ജനറൽ കൺവീനർ ശ്യംലാൽ, പറക്കോട് ബ്ലോക്ക് പഞ്ചായത്ത് പ്രസിഡണ്ട് എംപി മണിയമ്മ, മലയാലപ്പുഴ ഗ്രാമപഞ്ചായത്ത് പ്രസിഡണ്ട് പ്രീജ പി നായർ, എ.ദീപകുമാർ,രാജു നെടുവംപുറം, സന്തോഷ് കൊല്ലംപടി, രാജേഷ് ആക്ളേത്ത്, അനീഷ് കുമാർ, സംഗേഷ് ജി നായർ, കെ ജി രാമചന്ദ്രൻ പിള്ള കൃഷ്ണകുമാർ, രാജേഷ്, സന്തോഷ്, ബൈജു വടക്കേടത്ത്, അജിത്ത്, ശാന്തകുമാർ തുടങ്ങിയവർ പ്രസംഗിച്ചു.
