കോന്നി : സാമൂഹ്യ വിരുദ്ധരുടെ താവളമായി മാറുകയാണ് നിർമ്മാണം പുരോഗമിക്കുന്ന കോന്നി കെ എസ് ആർ റ്റി സി ഡിപ്പോ. കെ എസ് ആർ റ്റി സി ഡിപ്പോയ്ക്ക് വേണ്ടി നിർമ്മിക്കുന്ന കെട്ടിടത്തിന്റെ മുകളിലത്തെ നിലയും തുറന്നു കിടക്കുന്ന മുറികളുമാണ് ഇപ്പോൾ സാമൂഹ്യ വിരുദ്ധരുടെ താവളം. പകൽ സമയങ്ങളിൽ പോലും ഈ ഭാഗത്തേക്ക് ആളുകൾ വരാതെയായതോടെ മദ്യപരുടെ ശല്യവും മറ്റ് ലഹരി ഉപയോഗവും സ്ഥലത്ത് വർധിച്ചിട്ടുണ്ട്. കോന്നി പോലീസും എക്സൈസ് വകുപ്പ് നടത്തിയ പരിശോധനയിൽ ഇവിടെ നിന്ന് കഞ്ചാവ് അടക്കം പിടിച്ചെടുത്തിട്ടുണ്ട്. ഓഫീസ് മുറികളുടെ ജനൽ ചില്ലുകൾ അടക്കം തകർത്താണ് സാമൂഹ്യ വിരുദ്ധർ കെട്ടിടത്തിന് ഉള്ളിൽ പ്രവേശിച്ചിരിക്കുന്നത്.
മദ്യ കുപ്പികൾ അടക്കം മുറിക്കുള്ളിൽ ചിതറി കിടക്കുന്നതും കാണാം. കോന്നി നാരായണപുരം ചന്തയോട് ചേർന്ന് കിടക്കുന്ന സ്ഥലമായതിനാൽ ചന്തക്കുളിൽ കൂടി കയറി സാമൂഹ്യ വിരുദ്ധർ കെട്ടിടത്തിനുള്ളിൽ പ്രവേശിച്ചാലും ആരും അറിയില്ല എന്നതാണ് പ്രധാനപ്പെട്ട കാര്യം. ഇതര സംസ്ഥാന തൊഴിലാളികൾ അടക്കം ഈ കെട്ടിടത്തിനുള്ളിൽ ലഹരി ഉപയോഗിക്കുന്നു എന്നതാണ് അറിയുവാൻ കഴിയുന്നത്. പോലീസും എക്സൈസ് വകുപ്പും ഇടക്കിടെ പരിശോധനകൾ നടത്തുന്നുണ്ട് എങ്കിലും സാമൂഹ്യ വിരുദ്ധ ശല്യം ദിനം പ്രതി വർധിച്ചു വരികയാണ്. കോന്നിയിൽ ലഹരിയുമായി ബന്ധപ്പെട്ട് നിരവധി കേസുകളും രജിസ്റ്റർ ചെയ്യപ്പെടുന്നുണ്ട്. സ്ഥലത്ത് രാത്രിയിൽ അടക്കം പരിശോധന ശക്തമാക്കേണ്ടത് ആവശ്യമാണ്.
