കോന്നി : സംസ്ഥാന സര്ക്കാര് കോടികള് മുടക്കി നിര്മ്മിച്ച കോന്നി മെഡിക്കല് കോളേജ് ആശുപത്രിയില് മാലിന്യ സംസ്കരണ സംവിധാനങ്ങളില്ല. ആധുനിക സജ്ജീകരണങ്ങള് എല്ലാമായി എന്ന് കോന്നി മെഡിക്കല് കോളേജിനെക്കുറിച്ച് പത്തനംതിട്ടക്കാര് അഭിമാനിക്കുമ്പോഴാണ് ഭക്ഷണാവശിഷ്ടങ്ങള് പോലും കുഴിച്ചുമൂടേണ്ടി വരുന്നത്. മെഡിക്കല് കോളേജ് പ്രവര്ത്തനം ആരംഭിച്ച കാലം മുതല് ആശുപത്രി മാലിന്യങ്ങള് ഉള്പ്പെടെ നിര്മ്മാര്ജനം ചെയ്യുവാന് ആവശ്യമായ യാതൊരു സംവിധാനങ്ങളും ഇവിടെ ഒരുക്കുവാന് ബന്ധപ്പെട്ട അധികൃതര് തയ്യാറായിട്ടില്ല. മെഡിക്കല് മാലിന്യങ്ങള് ഇപ്പോഴും സ്വകാര്യ എജന്സി വഴി ഇവിടെ നിന്നും പുറത്തേക്ക് കൊണ്ടുപോകുമ്പോള് ഭക്ഷണ അവശിഷ്ടങ്ങള് അടക്കം മെഡിക്കല് കോളേജിന് സമീപം കുഴിച്ചു മൂടുകയാണ് ചെയ്യുന്നത്.
കേരളത്തിലെ എല്ലാ സര്ക്കാര് മെഡിക്കല് കോളേജിലും മാലിന്യ സംസ്കരണത്തിന് ഇന്സിനേറ്റര് ഉണ്ടെങ്കിലും കോന്നി മെഡിക്കല് കോളേജില് മാത്രം ഇതൊന്നുമില്ല. മെഡിക്കല് കോളേജിലെ കാന്റീന്, മെഡിക്കല് കോളേജ് ഹോസ്റ്റല് തുടങ്ങിയ സ്ഥലങ്ങളിലെയെല്ലാം മാലിന്യങ്ങള് ഇപ്പോഴും മെഡിക്കല് കോളേജ് പരിസരത്ത് കുഴി കുത്തി മൂടുകയോ കത്തിച്ചു കളയുകയോ ആണ് ചെയ്യുന്നത്. കുഴികുത്തി മൂടുന്ന മാലിന്യങ്ങള് കാട്ടുപന്നി കുത്തി ഇളക്കുന്നത് രൂക്ഷമായ ദുര്ഗന്ധത്തിനും കാരണമാകുന്നുണ്ട്. വന്യമൃഗശല്യം ഇവിടെ കൂടുവാനും ഇതാണ് കാരണം.
കുഴിച്ചിടുന്ന മാലിന്യങ്ങള് അഴുകി സമീപത്തെ ജലാശയങ്ങളിലേക്ക് ഒഴുകി ഇറങ്ങുന്നതിനും സാധ്യതയുണ്ട്. മെഡിക്കല് കോളേജില് ആധുനിക സംവിധാനങ്ങള് ഉറപ്പാക്കുന്നു എന്ന് നിരന്തരം വാര്ത്തകളിലൂടെ കസര്ത്ത് നടത്തുമ്പോഴാണ് ഇവിടുത്തെ മാലിന്യങ്ങള് ശരിയായി സംസ്കരിക്കുവാന് കഴിയാതെ കുഴിച്ചുമൂടേണ്ടി വരുന്നത്.
