കോന്നി : കോന്നി മെഡിക്കൽ കോളേജിന് ദേശീയ മെഡിക്കൽ മിഷന്റെ അംഗീകാരം ലഭിച്ചതിൽ എൽ.ഡി.എഫ് ന്റെ നേതൃത്വത്തിൽ കോന്നി നഗരത്തിൽ ആഹ്ലാദ പ്രകടനം നടത്തി. സി പി എം കോന്നി ഏരിയ കമ്മറ്റി ഓഫീസിന് മുമ്പിൽ നിന്നും ആരംഭിച്ച പ്രകടനം കോന്നി നഗരത്തിൽ സമാപിച്ചു. എ ദീപകുമാർ, പി ജെ അജയകുമാർ, റഷീദ് മുളന്തറ, അബ്ദുൽ മുത്തലീഫ്, എ സോമശേഖരൻ, ആർ ഗോവിന്ദ് തുടങ്ങിയവര് പ്രകടനത്തിന് നേത്രുത്വം നല്കി.
സംസ്ഥാനത്തെ മുപ്പത്തിമൂന്നാമത് മെഡിക്കൽ കോളേജിന്റെ പട്ടികയിൽ കോന്നി മെഡിക്കൽ കോളേജ് ഇടംപിടിക്കുമ്പോൾ കോന്നിയുടെ വികസന ചരിത്രത്തിന് ഒരു പൊന്തൂവൽ കൂടി ലഭിച്ചിരിക്കുകയാണ്. 2012 മാർച്ച് 24 നാണ് കോന്നിയിൽ മെഡിക്കൽ കോളേജ് ആരംഭിക്കുന്നതിനായി സർക്കാർ ഉത്തരവ് ഉണ്ടാകുന്നത്. 143 കോടി രൂപ ആദ്യ ഘട്ടത്തിൽ സർക്കാർ അനുവദിച്ചു. യു ഡി എഫ് ഭരണകാലത്ത് മെഡിക്കൽ കോളേജ് ആരംഭിക്കുവാൻ സർക്കാർ ഉത്തരവ് ഉണ്ടാകുമ്പോൾ അഡ്വ.അടൂർ പ്രകാശ് ആയിരുന്നു കോന്നി എം.എൽ.എ.
നിർമ്മാണം പുരോഗമിക്കുന്നതിന് ഇടയിൽ ഫണ്ടിന്റെ അപര്യാപ്തത മൂലം നിർമ്മാണം ഏറ്റെടുത്ത കരാർ കമ്പനി നിർമ്മാണം പാതി വഴിയിൽ ഉപേക്ഷിക്കേണ്ട അവസ്ഥ വന്നു. തുടർന്ന് ഇടതുപക്ഷ എം എൽ എ കെ യു ജെനിഷ് കുമാർ കോന്നിയിൽ ജയിച്ചതിന് ശേഷം കിഫ്ബി വഴി ഫണ്ട് അനുവദിക്കുകയും മെഡിക്കൽ കോളജ് നിർമ്മാണം മുന്നോട്ട് കൊണ്ടുപോവുകയും ആയിരുന്നു.
