പത്തനംതിട്ട: കൊട്ടാരക്കര – ബെംഗളൂരു റൂട്ടിൽ കോന്നി, പത്തനംതിട്ട, റാന്നി വഴി കെഎസ്ആർടിസി സ്വിഫ്റ്റ് സൂപ്പർ ഡീലക്സ് ബസ് നാളെ മുതൽ സർവീസ് തുടങ്ങും. നവീകരിച്ച പുനലൂർ – മൂവാറ്റുപുഴ പാതയിലൂടെയുള്ള ആദ്യത്തെ സംസ്ഥാനാന്തര സർവീസാണിത്. പത്തനാപുരം, കോന്നി, പത്തനംതിട്ട, റാന്നി, എരുമേലി, ഈരാറ്റുപേട്ട, മുട്ടം, തൊടുപുഴ, മൂവാറ്റുപുഴ, പെരുമ്പാവൂർ, അങ്കമാലി, ചാലക്കുടി, തൃശൂർ, കോഴിക്കോട്, തൊട്ടിൽ പാലം, മാനന്തവാടി, കാട്ടിക്കുളം, തോൽപെട്ടി, മൈസൂരു, മണ്ഡ്യ വഴിയാണ് ബെംഗളൂരു എത്തുക. കൊട്ടാരക്കരയിൽ നിന്നു വൈകിട്ട് 3ന് പുറപ്പെടുന്ന ബസ് പിറ്റേദിവസം രാവിലെ 6.10ന് ബെംഗളൂരു എത്തും.
അവിടെ നിന്നു പിറ്റേദിവസം വൈകിട്ട് 6ന് പുറപ്പെടുന്ന ബസ് രാവിലെ 9.20ന് കൊട്ടാരക്കരയിൽ തിരിച്ച് എത്തും. ബസ് 3.20ന് പത്തനാപുരം, 3.40 കോന്നി, 3.50 പത്തനംതിട്ട, 4.15 റാന്നി, 4.45ന് എരുമേലി എത്തും. ബെംഗളൂരുവിൽ നിന്നു വൈകിട്ട് 6ന് പുറപ്പെടുന്ന ബസ് പിറ്റേദിവസം രാവിലെ 8.30ന് റാന്നി, 8.45ന് പത്തനംതിട്ട, 9.00ന് കോന്നിയിലും എത്തും. ബെംഗളൂരു – പത്തനംതിട്ട 994 രൂപ, റാന്നി 974 രൂപ, കോന്നി 1004 രൂപ, പത്തനാപുരം 1024 രൂപ. സീറ്റ് റിസർവേഷൻ സൗകര്യം ഉണ്ട്.
