കോഴിക്കോട് : കോഴിക്കോട് കോര്പ്പറേഷന് നഷ്ടപ്പെട്ട പണം തിരിച്ച് നല്കി പഞ്ചാബ് നാഷണല് ബാങ്ക്. റെയില്വേ ലിങ്ക് റോഡ് ബ്രാഞ്ചിലെ മാനേജറായിരുന്ന റിജില് സ്വന്തം അക്കൗണ്ടിലേക്ക് മാറ്റിയ 2.83 കോടി രൂപയാണ് പഞ്ചാബ് നാഷണല് ബാങ്ക് തിരിച്ച് നല്കിയത്. ബാങ്ക് സ്വന്തം തനത് ഫണ്ടില് നിന്നാണ് പണം നല്കിയത്. പണം നഷ്ടമായതില് കോര്പറേഷനും ബാങ്കും ആഭ്യന്തര പരിശോധനകള് നടത്തും. റിജിലിനെ കണ്ടെത്താനും അന്വേഷണം നടക്കുകയാണ്. രണ്ടരക്കോടിയിലേറെ പണം ഫണ്ടില് നിന്ന് നഷ്ടമായിട്ടും മാസങ്ങള്ക്ക് ശേഷമാണ് കോര്പറേഷന് തിരിച്ചറിഞ്ഞത്. കോര്പ്പറേഷന് രേഖകള് പലതും സൂക്ഷിച്ചിരുന്നില്ലെന്നാണ് ഉയരുന്ന വിമര്ശനം.
പഞ്ചാബ് നാഷണല് ബാങ്കിന്റെ കോഴിക്കോട് ലിങ്ക് റോഡ് ബ്രാഞ്ചില് പോലീസ് നേരത്തെ പരിശോധന നടത്തിയിരുന്നു. കോര്പ്പറേഷന്റെ അക്കൗണ്ടിലെ തുക മാനേജര് റിജില് തട്ടിയെടുത്ത കേസുമായി ബന്ധപ്പെട്ടായിരുന്നു ഈ പരിശോധന. കോര്പറേഷന്റെ അക്കൗണ്ടുമായി ബന്ധപ്പെട്ട രേഖകള് കോഴിക്കോട് ടൗണ് സിഐയുടെ നേതൃത്വത്തില് പരിശോധിച്ചു.
