മലപ്പുറം: സി പി ഐയുടെ അവകാശവാദത്തെ തള്ളി മുസ്ലീം ലീഗ് നേതാവ് കെ പി എ മജീദ് രംഗത്ത്. തിരൂരങ്ങാടിയില് അട്ടിമറി വിജയം നേടുമെന്ന സി പി ഐയുടെ അവകാശ വാദത്തെ ആണ് അദ്ദേഹം തള്ളിയത്. സിപിഐ എക്സിക്യൂട്ടീവ് യോഗം ഇന്നലെ വിലയിരുത്തിയത് തിരൂരങ്ങാടിയില് അട്ടിമറി വിജയം നേടുമെന്നാണ്. എന്നാല് എന്തിന്റെ പ്രതീക്ഷയിലാണ് സിപിഐയുടെ വിലയിരുത്തലെന്ന് തനിക്ക് അറിയില്ലെന്ന് കെ പി എ മജീദ് പറഞ്ഞു.
തിരൂരങ്ങാടിയിലെ സഖാക്കള്ക്ക് പോലും വിജയിക്കുമെന്ന ചിന്തയോ അഭിപ്രായമോ ഇല്ലെന്നും സംസ്ഥാനത്താകെ നടത്തിയിട്ടുള്ളത് ഇതേ പോലത്തെ വിലയിരുത്തലാണെങ്കില് വലിയ അപകടത്തിലേക്കാണ് സിപിഐ പോകുന്നതെന്നും അദ്ദേഹം പറഞ്ഞു. സിപിഐയുടെ സ്ഥിതി സംസ്ഥാനത്ത് ഏറെ ദയനീയമാണെന്നും സിപിഐ കേരളത്തില് കനത്ത പരാജയം ഈ തെരഞ്ഞെടുപ്പില് ഏറ്റുവാങ്ങുമെന്നും കെ പി എ മജീദ് പറഞ്ഞു.