തിരുവനന്തപുരം; മോദി സമുദായത്തെ അപമാനിച്ചെന്ന കേസില് രാഹുല് ഗാന്ധിക്കെതിരായ വിധിയുടെ പശ്ചാത്തലത്തില് വായ്മൂടിക്കെട്ടി പ്രതിഷേധിക്കാന് കോണ്ഗ്രസ്. കെപിസിസിയുടെ ആഹ്വാന പ്രകാരം സംസ്ഥാന വ്യാപകമായി കോണ്ഗ്രസ് മണ്ഡലം തലത്തില് വ്യാഴാഴ്ച വൈകുന്നേരം വായ്മൂടിക്കെട്ടി പ്രതിഷേധിക്കുമെന്ന് സംഘടനാ ചുമതലയുള്ള ജനറല് സെക്രട്ടറി ടി.യു.രാധാകൃഷ്ണന് അറിയിച്ചു.
‘എന്തുകൊണ്ടാണ് എല്ലാ കള്ളന്മാര്ക്കും മോദി എന്ന കുടുംബപ്പേര്’ എന്ന രാഹുല് ഗാന്ധിയുടെ വിവാദ പ്രസ്താവനയുടെ പേരിലാണ് വിധി പ്രസ്താവിച്ചിരിക്കുന്നത്. 2019-ല് കര്ണാടകയില് നടന്ന ഒരു റാലിയിലായിരുന്നു രാഹുലിന്റെ ഈ വിവാദ പ്രസ്താവന. രണ്ട് വര്ഷം തടവും 15,000 രൂപ പിഴയുമാണ് കേസില് രാഹുല് ഗാന്ധിക്ക് ശിക്ഷയായി വിധിച്ചിരുന്നത്. ബിജെപി എംഎല്എയും ഗുജറാത്ത് മുന് മന്ത്രിയുമായ പൂര്ണേഷ് മോദിയാണ് രാഹുലിനെതിരെ കോടതിയെ സമീപിച്ചത്. തുടര്ന്ന് ജാമ്യം അനുവദിച്ച കോടതി അപ്പീല് നല്കാന് 30 ദിവസത്തേക്ക് ശിക്ഷ നടപ്പാക്കുന്നത് മരവിപ്പിക്കുകയും ചെയ്തു. രണ്ടു വര്ഷത്തെ ശിക്ഷ ശരിവച്ചാല് രാഹുല് ഗാന്ധി ലോക്സഭയില്നിന്ന് അയോഗ്യനാകും. ഐപിസി സെക്ഷന് 504 പ്രകാരമാണ് രാഹുല് ഗാന്ധി ശിക്ഷിക്കപ്പെട്ടിരിക്കുന്നത്.
