കോട്ടയം : നട്ടാശേരിയില് കെ - റെയില് കല്ലിടലിനെതിരെ വീണ്ടും പ്രതിഷേധം. തിങ്കളാഴ്ചയുണ്ടായ പ്രതിഷേധം കണക്കിലെടുത്ത് പ്രതിഷേധക്കാര് എത്താതിരിക്കാന് കുഴിയാലിപ്പടിയിലേക്കുള്ള റോഡിന്റെ രണ്ട് വശവും പോലീസ് തടഞ്ഞിരുന്നു. എന്നാല് വിവരമറിഞ്ഞെത്തിയ നാട്ടുകാരും ജനപ്രതിനിധികളും പ്രതിഷേധം അറിയിച്ചു. ഇവര് പോലീസിനെതിരെ മുദ്രാവാക്യം വിളിച്ചു. ഡി.വൈ.എസ്.പി എ.ജെ തോമസിന്റെ നേതൃത്വത്തില് വന് പോലീസ് സന്നാഹമാണ് പ്രദേശത്ത് നിലയുറപ്പിച്ചിരിക്കുന്നത്. കല്ലിട്ടാലും പിഴുതെറിയുമെന്ന് പ്രതിഷേധക്കാര് പറഞ്ഞു. മേഖലയില് സംഘര്ഷ സാധ്യതയുണ്ട്. അതിരടയാള കല്ലിടാന് വന്ന ഉദ്യോഗസ്ഥരെ ഇന്നലെയും നട്ടാശേരിയില് ജനം തടഞ്ഞിരുന്നു.
