തൊടുപുഴ: മീറ്റര് റീഡിങ്ങില് കൃത്രിമം കാട്ടി കെഎസ്ഇബിക്ക് വൈദ്യുതി ബില് ഇനത്തില് ലക്ഷങ്ങളുടെ നഷ്ടം വരുത്തിയ കരാര് ജീവനക്കാരനെ ജോലിയില് നിന്ന് പിരിച്ചുവിട്ടു. 140 വീട്ടുകാരുടെ വൈദ്യുതി ഉപയോഗം രണ്ടു വര്ഷത്തോളം വളരെക്കുറച്ചു കാണിച്ച് കെഎസ്ഇബിക്ക് ലക്ഷങ്ങളുടെ നഷ്ടമാണുണ്ടാക്കിയത്. കുറ്റം സമ്മതിച്ച കരിമണ്ണൂര് സ്വദേശിയെ ജോലിയില് നിന്ന് പിരിച്ചുവിട്ടു. തൊടുപുഴ സെക്ഷന്-1 ഓഫീസിന് കീഴിലെ സീനിയര് സൂപ്രണ്ടിനെയും സീനിയര് അസിസ്റ്റന്റിനെയും സസ്പെന്ഡ് ചെയ്തു. സംഭവത്തില് വിജിലന്സ് വിഭാഗം അന്വേഷണം ആരംഭിച്ചു.
തൊടുപുഴ സെക്ഷനിലെ മീറ്റര് റീഡര്മാരെ പരസ്പരം സ്ഥലംമാറ്റിയപ്പോഴാണ് വന് ക്രമക്കേട് കണ്ടെത്തിയത്. ഈ മാസം പുതിയ ജീവനക്കാരന് റീഡിംഗ് എടുത്തപ്പോള് പ്രകടമായ മാറ്റം കണ്ടെത്തി. ശരാശരി 2,000 രൂപ വന്നിരുന്ന വീട്ടില് 35,000 രൂപ വരെയായി ബില് കുത്തനെ ഉയര്ന്നു. കുമാരമംഗലം, മണക്കാട് പഞ്ചായത്തുകളിലുള്ള ഉപഭോക്താക്കളാണിവര്. പരാതി ഉയര്ന്നതോടെ ഇതിന് മുമ്പ് റീഡിംഗ് എടുത്തിരുന്ന യുവാവിനെ ചോദ്യം ചെയ്യുകയായിരുന്നു. ബില് തുക കുറച്ചു നല്കി ഇയാള് സാമ്പത്തിക നേട്ടം ഉണ്ടാക്കിയോ എന്നുള്പ്പെടെ വിജിലന്സ് അന്വേഷണത്തിലേ വ്യക്തമാകൂ. കെഎസ്ഇ.ബി ഉദ്യോഗസ്ഥരുടെ ഇടപെടലുണ്ടോയെന്നും അന്വേഷിക്കും. മീറ്ററുകള് കെഎസ്ഇബിയുടെ പ്രത്യേക സ്ക്വാഡ് പരിശോധിക്കുകയാണ്.
