തൃശ്ശൂർ : കുന്നംകുളത്ത് കെ എസ് ആർ ടി സി ബസുകൾ തമ്മിൽ കൂട്ടിയിടിച്ച് അപകടം. അപകടത്തിൽ 15 ഓളം പേർക്ക് പരിക്കേറ്റു. ഇന്ന് പുലർച്ചെ രണ്ടേകാലോടെയാണ് അപകടം സംഭവിച്ചത്. കോഴിക്കോട്ടേക്ക് പോവുകയായിരുന്ന കെഎസ്ആർടിസി സൂപ്പർഫാസ്റ്റ് ബസും തൃശ്ശൂർ ഭാഗത്തേക്ക് വരികയായിരുന്ന സ്വിഫ്റ്റ് ബസുമാണ് അപകടത്തിൽപ്പെട്ടത്. തൃശ്ശൂരിലേക്ക് വരികയായിരുന്ന ബസ് റോഡിലെ ബാരിക്കേഡ് മറികടന്ന് നിയന്ത്രണം വിട്ട് എതിർദിശയിൽ വന്ന ബസ്സിലേക്ക് ഇടിച്ചു കയറുകയായിരുന്നു എന്നാണ് വിവരം. ബസ്സുകളുടെ മുൻഭാഗങ്ങൾ തമ്മിലാണ് ഇടിച്ചത്.
അപകടത്തിൽ ബസ്സുകളുടെ ചില്ലുകൾ പൂർണ്ണമായും തകർന്നു. നിയന്ത്രണം വിട്ട ബസ് മറ്റൊരു ബസ്സിലേക്ക് നേരിട്ട് ഇടിച്ചു കയറിയതിനാൽ ഇടിയുടെ ആഘാതം വളരെ കൂടുതലായിരുന്നു. അപകടത്തിൽ പരിക്കേറ്റ 15 പേരിൽ അഞ്ചുപേർക്ക് നിസ്സാര പരിക്കുകളാണുള്ളത്. ബാക്കി 10 പേർ ആശുപത്രിയിൽ ചികിത്സ തേടിയിട്ടുണ്ട്. എന്നാൽ ആരുടെയും പരിക്ക് ഗുരുതരമല്ല എന്നാണ് വിവരം. പരിക്കേറ്റവരെ കുന്നംകുളത്തെ സ്വകാര്യ ആശുപത്രിയിലും താലൂക്ക് ആശുപത്രിയിലുമായി പ്രവേശിപ്പിച്ചു.
