കൊച്ചി : ഇടപ്പള്ളി-വൈറ്റില ബൈപ്പാസിൽ കെഎസ്ആർടിസി മിന്നൽ ബസ് അപകടത്തിൽപ്പെട്ടു. ഇന്ന് വെളുപ്പിന് നാല് മണിയോടെ മെഡിക്കൽ സെന്റർ ആശുപത്രിക്ക് സമീപമാണ് സംഭവം നടന്നത്. ബസ്സിലുണ്ടായിരുന്ന 24 യാത്രക്കാരും പരിക്കേൽക്കാതെ അത്ഭുതകരമായി രക്ഷപ്പെട്ടു. മുന്നിലുണ്ടായിരുന്ന ഒരു വാഗണർ കാർ പെട്ടെന്ന് വെട്ടിച്ചപ്പോൾ അതിൽ ഇടിക്കാതിരിക്കാൻ ബസ് വെട്ടിച്ചു മാറ്റിയതാണ് അപകടത്തിന് കാരണമായതെന്ന് ഡ്രൈവർ പറഞ്ഞു. നിയന്ത്രണം വിട്ട ബസ് റോഡരികിലെ കാനയിലേക്ക് തെന്നി മാറുകയായിരുന്നു. ബസ് പൂർണ്ണമായും മറിയാതിരുന്നതിനാലാണ് വലിയൊരു അപകടം ഒഴിവായതെന്ന് ദൃക്സാക്ഷികൾ പറഞ്ഞു.
അപകടവിവരമറിഞ്ഞ് പോലീസും ഫയർഫോഴ്സും ഉടൻ സ്ഥലത്തെത്തി രക്ഷാപ്രവർത്തനം നടത്തി. യാത്രക്കാരെ ഉടൻ തന്നെ മറ്റൊരു വാഹനത്തിലേക്ക് മാറ്റി. അപകടത്തെത്തുടർന്ന് പുലർച്ചെ ബൈപ്പാസിൽ ചെറിയ രീതിയിൽ ഗതാഗത തടസ്സം അനുഭവപ്പെട്ടിരുന്നെങ്കിലും നിലവിൽ അത് പരിഹരിച്ചിട്ടുണ്ട്. കാനയിൽ കുടുങ്ങിക്കിടക്കുന്ന ബസ് ഉയർത്തി മാറ്റാനുള്ള നടപടികൾ പുരോഗമിക്കുകയാണ്.
