കണ്ണൂര് : കണ്ണൂരില്നിന്നുള്ള കെ.എസ്.ആര്.ടി.സി. സര്വീസുകള് മിക്കതും ഞായറാഴ്ചയും മുടങ്ങി. 80 ബസുകളില് 30 എണ്ണം മാത്രമാണ് കണ്ണൂര് ഡിപ്പോയില്നിന്ന് ഓടിയത്. ഡീസല് നിറയ്ക്കാന് പണമില്ലാതായതോടെ ദിവസങ്ങളായി കെ.എസ്.ആര്.ടി.സി സര്വീസുകള് താളംതെറ്റിയിരിക്കയാണ്. ബെംഗളൂരുവിലേക്ക് രാവിലെയും രാത്രിയുമുള്ള സര്വീസുകള് നടത്തി.
തിരുവനന്തപുരം, എറണാകുളം ബസുകളും മറ്റു ചില ദീര്ഘദൂര ബസുകളും ഓടി. കാസര്കോട്ടേക്ക് എട്ട് ടൗണ് ടു ടൗണ് ബസുകളും ഓടി. കൂട്ടുപുഴ, ഇരിട്ടി, കുടിയാന്മല സര്വീസുകളും ഓടിച്ചു. ഓര്ഡിനറി സര്വീസുകള് ഓടിക്കാന് നിവൃത്തിയില്ലാത്ത അവസ്ഥയിലാണിപ്പോള്. തലശ്ശേരി, പയ്യന്നൂര് സബ് ഡിപ്പോകളിലും ഡീസല് ക്ഷാമം ബാധിച്ചിട്ടുണ്ട്. ഇവിടെയും ഷെഡ്യൂളുകള് പലതും ഞായറാഴ്ചയും മുടങ്ങി.
