തിരുവനന്തപുരം : കെ.എസ്.ആര്.ടിയിലെ ശമ്പള വിതരണം ഇന്ന് ആരംഭിക്കുമെന്ന് സി.എം.ഡി ബിജു പ്രഭാകര്. ക്രിസ്മസ് അവധി ഉള്പ്പെടെയുള്ളവ പരിഗണിച്ച് തിങ്കളാഴ്ച വളരെയധികം യാത്രക്കാര് കെ.എസ്.ആര്.ടി.സിയെ ആശ്രയിക്കുന്നതിനാല് ജീവനക്കാര് ജോലി ബഹിഷ്കരിച്ച് സര്വീസ് മുടക്കരുതെന്നും അദ്ദേഹം ആവശ്യപ്പെട്ടു. ബഹിഷ്കരണം കാരണമുള്ള സര്വീസ് മുടക്കം സ്ഥാപനത്തെ ജനങ്ങളില് നിന്ന് അകറ്റാനേ ഉപകരിക്കൂ. നിലവില് ഡ്യൂട്ടി ബഹിഷ്കരിക്കുന്ന സംഘടനകള് തിങ്കളാഴ്ച ശമ്പളം വിതരണം ചെയ്യുമെന്ന ഉറപ്പില് പിന്മാറണം.
വെള്ളിയാഴ്ച മുതല് മൂന്ന് ദിവസങ്ങളിലായി ജീവനക്കാരുടെ ബഹിഷ്കരണം കാരണം പ്രതിദിന വരുമാനത്തില് ഏകദേശം മൂന്നരക്കോടി രൂപയുടെ നഷ്ടമാണുണ്ടായത്. കോവിഡിന് ശേഷമുള്ള റെക്കോഡ് വരുമാനമായിരുന്നു കഴിഞ്ഞ തിങ്കളാഴ്ച -5.79 കോടി രൂപ. വെള്ളിയാഴ്ചയും അതുപോലെ വരുമാനം ലഭിക്കേണ്ടതായിരുന്നു. എന്നാല് 4.83 കോടിയായി കുറഞ്ഞു. ഈ സാഹചര്യത്തില് തിങ്കളാഴ്ച ഡ്യൂട്ടി ബഹിഷ്കരണം നടത്തിയാല് സാമ്പത്തിക പ്രതിസന്ധി കൂടുതല് രൂക്ഷമാകുമെന്നും അദ്ദേഹം പറഞ്ഞു.
