തിരുവല്ല : കെ.എസ്.ആർ.ടി.സിയുടെ ബംഗളൂരു സർവ്വീസ് നിലച്ചിട്ട് എട്ടുമാസം പിന്നിടുന്നു. മറ്റ് സർവിസുകൾ പുനരാരംഭിച്ചിട്ടും തിരുവല്ലയിലെ ഏക അന്തർസംസ്ഥാന സർവ്വീസിനെ അവഗണിക്കുകയാണ് അധികൃതർ.
തിരുവല്ലയിൽ നിന്നുള്ള ബംഗളൂരു സർവിസ് കോവിഡിനെ തുടർന്ന് മാർച്ചിലാണ് നിർത്തിവെച്ചത്. ദിവസവും ഉച്ചക്ക് രണ്ടിന് തിരുവല്ലയിൽനിന്ന് പുറപ്പെട്ട് പിറ്റേന്ന് രാവിലെ ബംഗളൂരുവിൽ എത്തിച്ചേരുന്ന സർവിസ് യാത്രക്കാർക്ക് ഏറെ ഗുണകരമായിരുന്നു. സെമിസ്ലീപ്പർ ഡീലക്സ് ബസാണ് ഉപയോഗിച്ചിരുന്നത്. ഇവിടെനിന്നും ബംഗളൂരുവിൽനിന്നും രണ്ട് ബസ് അങ്ങോട്ടും ഇങ്ങോട്ടും സർവിസ് നടത്തിയിരുന്നു. ദിവസവും മുക്കാൽ ലക്ഷത്തോളം രൂപയുടെ വരുമാനവും ലഭിച്ചിരുന്നു. സർവീസ് നിലച്ചതോടെ ബസുകൾ തിരുവനന്തപുരത്തക്ക് കൊണ്ടുപോയി. യാത്രക്കുള്ള നിയന്ത്രണം നീക്കിയതോടെ അടുത്തകാലത്തായി ബംഗളൂരുവിലേക്കുള്ള യാത്രക്കാർ ബസ് അന്വേഷിച്ച് എത്താറുണ്ട്.
ആവശ്യക്കാർ വർധിച്ചിട്ടും സർവിസ് പുനരാരംഭിക്കാൻ അധികൃതർ നടപടി സ്വീകരിക്കാത്തത് പ്രതിഷേധം ഉയർത്തിയിട്ടുണ്ട്. മറ്റു സ്വകാര്യ സർവിസുകളെ അപേക്ഷിച്ച് യാത്രക്കൂലിയിലെ കുറവും സുരക്ഷിതത്വവും കാരണം സർവിസിനെ യാത്രക്കാർ ഇഷ്ടപ്പെട്ടിരുന്നു. സ്വകാര്യ ബസുകൾ ബംഗളൂരു സർവിസ് തുടങ്ങിയിട്ടും കെ.എസ്.ആർ.ടി.സി പുനരാരംഭിക്കാത്തത് സ്വകാര്യ ബസ് ലോബിയെ സഹായിക്കാനാണെന്നും യാത്രക്കാര് പറയുന്നു.
