കോന്നി : ബ്ലോക്ക് പഞ്ചായത്ത് ഭരണസമിതിയോടും താലൂക്ക് ആശുപത്രി അധികൃതരോടും എന്.എച്ച്.എം ജില്ലാ പ്രോഗ്രാം മാനേജരോടും ആലോചിച്ചാണ് കോന്നി താലൂക്ക് ആശുപത്രിയിലെ ഓക്സിജന് പ്ലാന്റ് ഉദ്ഘാടനം നടത്തിയതെന്ന് കെ.യു.ജനീഷ് കുമാര് എം.എല്.എ പറഞ്ഞു.
എം.എല്.എ എന്ന നിലയില് താലൂക്ക് ആശുപത്രിക്ക് പ്രഖ്യാപിച്ച 10 കോടി രൂപയുടെ വികസന പദ്ധതികളുടെ ഭാഗമായി എന്.എച്ച്.എം ഫണ്ട് ഉപയോഗിച്ച് നിര്മ്മിച്ചതാണ് കേന്ദ്രീകൃത ഓക്സിജന് പ്ലാന്റ് . താലൂക്ക് ആശുപത്രിയില് സര്ക്കാരും എം.എല്.എയും നടത്തുന്ന വികസന പ്രവര്ത്തനങ്ങളോട് സഹകരിക്കാതെ യു.ഡി.എഫിലെ ഒരു വിഭാഗം സ്ഥിരമായി ബഹിഷ്കരണം നടത്തുകയാണ്.
താലൂക്ക് ആശുപത്രിയ്ക്ക് എം.എല്.എ ഫണ്ടില് നിന്നും നല്കിയ ആംബുലന്സ് ഏറ്റുവാങ്ങാന് പോലും ബ്ലോക്ക് പഞ്ചായത്ത് പ്രസിഡന്റ് എത്തിയില്ല. കോന്നിയിലെ വികസന പ്രവര്ത്തനങ്ങളെ ബഹിഷ്കരണത്തിലൂടെ തടഞ്ഞു നിര്ത്താമെന്നത് വ്യാമോഹം മാത്രമാണ്. യു.ഡി.എഫ് കാലത്ത് നടക്കാതിരുന്നത് ഇപ്പോള് നടക്കുമ്പോള് സങ്കുചിത രാഷ്ട്രീയം മാത്രം കാണുന്നവര്ക്ക് സഹിക്കില്ല എന്നറിയാം. കോന്നിയുടെ പൊതു വികസനങ്ങളെ ബഹിഷ്കരണങ്ങളിലൂടെയും വിവാദങ്ങളുണ്ടാക്കിയും തകര്ക്കാന് ശ്രമിക്കുന്നവരെ ജനങ്ങള് തന്നെ ബഹിഷ്കരിക്കുമെന്നും എം.എല്.എ പറഞ്ഞു.
