പത്തനംതിട്ട : ഓണ്ലൈന് പോര്ട്ടല് മുഖേന കുടുംബശ്രീ ഉത്പന്നങ്ങള് (www.kudumbashreebazaar.com) വിപണിയില് എത്തിക്കുന്ന ഓണം ഉത്സവ് വിപണന മേളയ്ക്ക് തുടക്കമായി. കോവിഡിന്റെ പ്രതിസന്ധികള്ക്കിടയില് ഓണക്കാലത്ത് കുടുംബശ്രീ സംരംഭകര്ക്കും കൃഷി സംഘാംഗങ്ങള്ക്കും പരമാവധി പിന്തുണയേകാനുള്ള ശ്രമത്തിലാണ് കുടുംബശ്രീ.
സംരംഭകര്ക്ക് മികച്ച വിറ്റുവരവ് നേടാനും പ്രതിസന്ധികളെ മറികടക്കാനുമുള്ള സുവര്ണാവസരമാണ് ഓണം ഉത്സവ് ഓണ്ലൈന് വിപണന മേള. നാല്പ്പതു ശതമാനം വരെ ഡിസ്കൗണ്ട് ലഭിക്കുന്ന ഓഫറുകളും കോംബോ ഓഫറുകളും സൗജന്യ ഹോം ഡെലിവറിയുമാണ് മേളയുടെ ആകര്ഷണം. തുണിത്തരങ്ങള്, മസാലപ്പൊടികള്, ബാഗുകള്, കുടകള്, സുഗന്ധ വ്യഞ്ജനങ്ങള് തുടങ്ങിയവ ഓണ്ലൈന് മേളയിലൂടെ വാങ്ങാനാകും.
കുടുംബശ്രീ ജില്ലാതല ഓണവിപണന മേളയുടെ സമാപന സമ്മേളനത്തിന്റെയും ഓണ്ലൈന് പോര്ട്ടല് മുഖേന കുടുംബശ്രീ ഉത്പന്നങ്ങള് വിപണിയില് എത്തിക്കുന്ന ഓണം ഉത്സവ് വിപണന മേളയുടെയും ഉദ്ഘാടനം പത്തനംതിട്ട മുനിസിപ്പല് ബസ് സ്റ്റാന്ഡ് ഓപ്പണ് സ്റ്റേജ് ഗ്രൗണ്ടില് ജില്ലാ കളക്ടര് ഡോ. ദിവ്യാ എസ്. അയ്യര് നിര്വഹിച്ചു.
കുടുംബശ്രീ ജില്ലാമിഷന് കോ-ഓര്ഡിനേറ്റര് എ. മണികണ്ഠന്റെ അധ്യക്ഷതയില് ചേര്ന്ന യോഗത്തില് അസിസ്റ്റന്ഡ് ജില്ലാ മിഷന് കോ-ഓര്ഡിനേറ്റര്മാരായ എല്. ഷീല, കെ.എച്ച്. സലീന, പത്തനംതിട്ട സിഡിഎസ് ചെയര്പേഴ്സണ് മോനി വര്ഗീസ്, എംഇഡിപിഎം എലിസബത്ത് ജി. കൊച്ചില്, മാര്ക്കറ്റിംഗ് ഡിപിഎം അനു ഗോപി എന്നിവര് പങ്കെടുത്തു. കുടുംബശ്രീ സംരംഭകരായ വനിതകള്ക്ക് നാലു ദിവസങ്ങളിലായി നടന്ന ജില്ലാതല ഓണവിപണന മേളയിലൂടെ ആകെ 2,50,000 രൂപയില് കൂടുതല് വരുമാനം നേടുന്നതിന് സാധിച്ചു.