ആറന്മുള : നൂറിലേറെ കുടുംബങ്ങള് താമസിക്കുന്ന ആറന്മുള പഞ്ചായത്തിലെ ഏഴാം വാര്ഡില്പ്പെട്ട കുളമാപ്പുഴി പ്രദേശത്തുകൂടിയുള്ള സ്വകാര്യ ബസ് സര്വീസ് നിലച്ചിട്ട് പത്തുവര്ഷം കഴിയുന്നു .കിടങ്ങന്നൂരിലേക്കും ആറന്മുളയിലേക്കും പോകേണ്ട പ്രദേശവാസികള് യാത്രാദുരിതത്തിലാണ്. ആറന്മുളയില് നിന്ന് കുളമാപ്പുഴി വഴി നാല്ക്കാലിക്കല് എത്തുന്ന റോഡാണിത്. സ്കൂള്-കോളേജ് വിദ്യാര്ഥികള് ഉള്പ്പെടെ കാല്നടയായും ഓട്ടോയിലുമാണ് ഇപ്പോള് ആറന്മുളയിലെത്തുന്നത്.
മോശം റോഡും യാത്രക്കാരില്ലാത്തതുമാണ് ബസ് സര്വീസ് നിര്ത്താനുള്ള കാരണമായി അന്ന് പറഞ്ഞത്. എന്നാല്, ഇപ്പോള് റോഡ് മികച്ച നിലവാരത്തില് പൂര്ത്തിയാക്കി. നാല്ക്കാലിക്കല് എരുമക്കാട് വഴി ചെങ്ങന്നൂരിലേക്ക് ഈ റോഡിലൂടെ എത്താനും കഴിയും. നിരവധി തവണ ഈ ആവശ്യവുമായി നാട്ടുകാര് ജനപ്രതിനിധികളെ സമീപിച്ചിരുന്നു. അനുകൂല നടപടികള് ഉണ്ടാകുമെന്നുള്ള വാഗ്ദാനം ലഭിക്കുമെങ്കിലും ഒന്നും നടന്നിട്ടില്ലെന്ന് നാട്ടുകാര് പറയുന്നു.