തിരുവല്ല : മരം വെട്ടുന്നതിനിടെ ശിഖരത്തിനിടയിൽ കുടുങ്ങിപ്പോയ കുറ്റപ്പുഴ സ്വദേശിയായ യുവാവിനെ അഗ്നിശമന സേന അതി സാഹസികമായി രക്ഷപെടുത്തി. കിഴക്കൻ മുത്തൂർ പുത്തൻ വീട്ടിൽ ജോബി (30) യെ ആണ് തിരുവല്ലയിൽ നിന്നുമെത്തിയ അഗ്നിശമന സേന ഇന്നലെ വൈകിട്ട് 4 മണിയോടെ രക്ഷപെടുത്തിയത്. കുറ്റപ്പുഴ പ്രിയ വില്ലയിൽ മേരിയുടെ പുരയിടത്തിലെ കൂറ്റൻ ആഞ്ഞിലി മരം മുറിച്ചു മാറ്റുന്നതിനിടെയാണ് അപകടമുണ്ടായത്. മുറിച്ചു മാറ്റിയ ശിഖരത്തിനും മരത്തിനുമിടയിൽ മരം വെട്ട് തൊഴിലാളിയായ ജോബി കുടുങ്ങുകയായിരുന്നു.
സംഭവമറിഞ്ഞ് സ്ഥലത്തെത്തിയ അഗ്നിശമന സേനാംഗങ്ങൾ ചേന്ന് ലാഡറും, റോപ്പും, നെറ്റും ഉപയോഗിച്ച് ജോബിയെ താഴെ എത്തിക്കുകയായിരുന്നു. സാരമായി പരിക്കേറ്റ ജോബിയെ തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു. സ്റ്റേഷൻ ഓഫീസർ ആർ.ബാബുവിന്റെ നേതൃത്വത്തിൽ ഗ്രേഡ് അസി.സ്റ്റേഷൻ ഓഫീസറന്മാരായ ജി.മധുസൂദനൻ നായർ, സോജൻ മാത്യു, ഉദ്യോഗസ്ഥരായ അഭിലാഷ്, അജീഷ് കുമാർ , പി.സജു , എ.ഷംനാദ്, ജി.കെ ഷിജു, ഹോം ഗാർഡ് ഷാജി എന്നിവർ രക്ഷാ പ്രവർത്തനത്തിന് നേതൃത്വം നൽകി.