കുമ്പനാട് : പണം വെച്ച് ചീട്ടുകളി, കുമ്പനാട് നാഷണല് ക്ലബ്ബില് നിന്നും 10 ലക്ഷത്തി 23000 രൂപ പിടിച്ചെടുത്തു. പത്തനംതിട്ട ജില്ലാ പോലീസ് സൂപ്രണ്ടിന് ലഭിച്ച രഹസ്യ സന്ദേശത്തെ തുടര്ന്നാണ് പരിശോധന നടത്തിയത്. ഇന്ന് വൈകുന്നേരം നാലരയോടെ എസ്.പി യുടെ പ്രത്യേക സംഘവും കോയിപ്രം സി.ഐ സജീഷ് കുമാറിന്റെ നേത്രുത്വത്തിലുള്ള സംഘവും ഒന്നിച്ചായിരുന്നു പരിശോധന.
ഇവിടെനിന്നും 11 പേരെ അറസ്റ്റ് ചെയ്തു. ഇവര് ക്ലബ്ബിലെ അംഗങ്ങളാണെന്നാണ് വിവരം. അറസ്റ്റിലായവരുടെ കൂട്ടത്തില് ഒരു പോലീസ് ഉദ്യോഗസ്ഥനും ഉണ്ട്. പഴുതുകള് അടച്ചുകൊണ്ടായിരുന്നു എസ്.പി യുടെ ഓപ്പറേഷന്. പരിശോധനാസമയം മുഴുവന് എസ്.പി വീഡിയോ കോളിലൂടെ നടപടികള് നിരീക്ഷിച്ചിരുന്നു. പോലീസ് മേല് നടപടികള് സ്വീകരിച്ചുവരുന്നു.
