ഹരിദ്വാര്: ഹരിദ്വാറിലെ കുംഭമേളയുടെ ഭാഗമായി തിങ്കളാഴ്ച ഗംഗാ നദിയില് നടന്ന ഷാഹ സ്നാനില് (രാജകീയ കുളി) പങ്കെടുത്ത 102 പേര്ക്ക് കോവിഡ് സ്ഥിരീകരിച്ചു. മാസ്ക് ധരിക്കുകയോ ശാരീരിക അകലം പാലിക്കുകയോ ചെയ്യാതെ 28 ലക്ഷത്തോളം ഭക്തരാണ് ഇതില് പങ്കെടുത്തത്. ഇവരില് നിന്ന് 18,169 പേരെ പരിശോധനക്ക് വിധേയമാക്കിയപ്പോഴാണ് 102 പേര്ക്ക് കോവിഡ് കണ്ടെത്തിയത്.
ആരോഗ്യവകുപ്പ് നടത്തിയ കോവിഡ് ടെസ്റ്റിന്റെ കണക്കുകളാണ് ഉത്തരാഖണ്ഡ് സര്ക്കാര് പുറത്തുവിട്ടത്. ജനുവരി 14ന് ആരംഭിച്ച കുംഭമേള ചടങ്ങുകള് ഏപ്രില് 27നാണ് അവസാനിക്കുക. ഇതിനിടയില് ദശലക്ഷക്കണക്കിനാളുകള് പങ്കെടുക്കുന്ന നാല് ഷാഹി സ്നാനുകള് നടക്കും.
പങ്കെടുക്കുന്നവരുടെ ശരീരോഷ്മാവ് പരിശോധന, മാസ്ക് ധരിക്കല്, സാമൂഹിക അകലം പാലിക്കല് തുടങ്ങിയ അടിസ്ഥാന കോവിഡ് പ്രതിരോധ മാര്ഗങ്ങള് പോലും നടപ്പാക്കാന് ഉത്തരാഖണ്ഡ് സര്ക്കാറിന് കഴിയുന്നില്ല. കോവിഡ് നെഗറ്റീവാണെന്ന് തെളിയിക്കാന് ആര്.ടി.പിസിആര് ടെസ്റ്റ് നടത്തി റിപ്പോര്ട്ടുമായി വരുന്നവരെ മാത്രമേ കുംഭമേളയില് പ്രവേശിപ്പിക്കൂ എന്ന് തുടക്കത്തില് സര്ക്കാര് പ്രഖ്യാപിച്ചിരുന്നു. എന്നാല്, ഇതൊന്നും നടപ്പാക്കിയില്ല.