കോഴിക്കോട്: സ്കൂൾ കുട്ടികളുമായി മടങ്ങുന്നതിനിടെ ദേഹാസ്വാസ്ഥ്യം അനുഭവപ്പെട്ട സ്കൂൾ വാൻ ഡ്രൈവർ കുട്ടികളുടെ സുരക്ഷ ഉറപ്പാക്കിയ ശേഷം ആശുപത്രിയിൽ മരണമടഞ്ഞു. കുറ്റ്യാടി അടുക്കത്ത് അയിരാണിപ്പൊയിൽ സ്വദേശിയായ അനിൽ കുമാർ (50) ആണ് മരിച്ചത്. തിങ്കളാഴ്ച വൈകിട്ട് വേളം ഭാഗത്തേക്ക് കുട്ടികളുമായി പോകുന്നതിനിടെ ചെറുകുന്ന് വാഴയിൽമുക്ക് പ്രദേശത്ത് എത്തിയപ്പോഴാണ് അനിലിന് ദേഹാസ്വാസ്ഥ്യം അനുഭവപ്പെട്ടത്. അപകടസാധ്യത മനസ്സിലാക്കിയ അദ്ദേഹം വാഹനം റോഡരികിലേക്ക് സുരക്ഷിതമായി ഒതുക്കി നിർത്തുകയായിരുന്നു.
തുടർന്ന് സമീപത്തുണ്ടായിരുന്ന നാട്ടുകാരുടെ സഹായത്തോടെ സ്വന്തം മൊബൈൽ ഫോണിൽ നിന്ന് സ്കൂൾ അധികൃതരെ വിവരമറിയിച്ചു. വിവരം ലഭിച്ച ഉടൻ സ്കൂൾ അധികൃതർ ആംബുലൻസുമായി സ്ഥലത്തെത്തി അനിലിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഇതിനിടെ മറ്റൊരു ഡ്രൈവറെ സ്ഥലത്തെത്തിച്ച് സ്കൂൾ അധികൃതർ വാനിലുണ്ടായിരുന്ന കുട്ടികളെ സുരക്ഷിതമായി വീടുകളിൽ എത്തിച്ചു.
