കുവൈത്ത് സിറ്റി: പുസ്തകങ്ങൾക്കുള്ളിൽ അതിവിദഗ്ധമായി ഒളിപ്പിച്ച് എയർ കാർഗോ വഴി കുവൈത്തിലേക്ക് കടത്താൻ ശ്രമിച്ച ഏകദേശം രണ്ട് കിലോഗ്രാം മെത്താംഫെറ്റമിൻ അധികൃതർ പിടികൂടി. സംഭവവുമായി ബന്ധപ്പെട്ട് ഒരു ഏഷ്യൻ പ്രവാസിയെ കുവൈത്ത് ജനറൽ ഡയറക്ടറേറ്റ് ഓഫ് ഡ്രഗ് കൺട്രോൾ അറസ്റ്റ് ചെയ്തു. രഹസ്യവിവരത്തിന്റെ അടിസ്ഥാനത്തിൽ നടത്തിയ നിരീക്ഷണമാണ് വൻ ലഹരിക്കടത്ത് ശ്രമം പൊളിക്കാൻ സഹായിച്ചത്. ആഭ്യന്തര മന്ത്രാലയത്തിന്റെ അറിയിപ്പനുസരിച്ച്, ഒരു ഏഷ്യൻ രാജ്യത്തുനിന്നാണ് എയർ കാർഗോ വഴിയുള്ള ചരക്കിൽ മയക്കുമരുന്ന് കുവൈത്തിലെത്തിയത്. പരിശോധനയിൽ നിന്ന് രക്ഷപ്പെടാനായി പുസ്തകങ്ങളുടെ ഉള്ളിൽ പ്രത്യേക രീതിയിൽ ഒളിപ്പിച്ച നിലയിലായിരുന്നു മെത്താംഫെറ്റമിൻ.
ലഭിച്ച രഹസ്യവിവരത്തെ തുടർന്ന് നടത്തിയ അന്വേഷണത്തിലും നിരീക്ഷണത്തിലുമാണ് സുരക്ഷാ ഉദ്യോഗസ്ഥർ ലഹരിമരുന്ന് കണ്ടെത്തിയത്. തുടർന്ന് കുവൈത്തിൽ ഇത് വിതരണം ചെയ്യുന്നതിനായി ചരക്ക് സ്വീകരിക്കാൻ എത്തിയതായി സംശയിക്കുന്ന ഏഷ്യൻ പ്രവാസിയെയും അറസ്റ്റ് ചെയ്തു. പിടിച്ചെടുത്ത മയക്കുമരുന്നും പ്രതിയെയും തുടർ നിയമനടപടികൾക്കായി ബന്ധപ്പെട്ട വകുപ്പുകൾക്ക് കൈമാറിയതായി അധികൃതർ അറിയിച്ചു. മയക്കുമരുന്ന് അയച്ച രാജ്യത്തെ സുരക്ഷാ ഏജൻസികളുമായി കുവൈത്ത് അധികൃതർ ഏകോപനം നടത്തി കൂടുതൽ അന്വേഷണം തുടരുകയാണ്.
