കുവൈത്ത് സിറ്റി : കുവൈത്തില്‍ ഫഹാഹീര്‍ പ്രദേശത്തെ ആളൊഴിഞ്ഞ കെട്ടിടത്തില്‍ മരിച്ച നിലയില്‍ കണ്ടെത്തിയയാളെ തിരിച്ചറിഞ്ഞു. കോട്ടയം വേളൂര്‍ സ്വദേശി മുഹമ്മദ് അന്‍സാര്‍ ആണ് (47) മരിച്ചത്. ഒരുമാസം മുമ്പാണ് ഇദ്ദേഹത്തെ കാണാതായത്. അന്നുമുതല്‍ സുഹൃത്തുക്കളും സാമൂഹിക പ്രവര്‍ത്തകരും അന്വേഷിച്ചുവരികയായിരുന്നു. ഫഹാഹീലിലെ ഒരു വസ്ത്ര വ്യാപാര സ്ഥാപനത്തിലെ ജോലിക്കാരനായിരുന്നു ഇദ്ദേഹം.
മൃതദേഹം കണ്ടെത്തിയതിന് സമീപത്തെ ഒഴിഞ്ഞ സ്ഥലത്ത് മുഹമ്മദ് അന്‍സാര്‍ സ്ഥിരമായി ഇരിക്കാറുണ്ടായിരുന്നു എന്ന വിവരത്തിന്റെ അടിസ്ഥാനത്തിലാണ് ഈ ഭാഗത്ത് കൂടുതല്‍ അന്വേഷണം നടത്തിയത്. ബുധനാഴ്ച കണ്ടെത്തിയ മൃതദേഹം അന്‍സാറിന്റെതാണെന്ന് ഞായറാഴ്ച ഫോറന്‍സിക് പരിശോധനയില്‍ സ്ഥിരീകരിച്ചു. ഭാര്യ ദുബൈയില്‍ നഴ്സ് ആണ്. രണ്ട് മക്കള്‍ നാട്ടിലുണ്ട്. മൃതദേഹം കുവൈത്തല്‍ സംസ്കരിക്കും.
