കുവൈത്ത് സിറ്റി : കുവൈത്തിൽ ഇന്ന് (മാർച്ച് 12) മുതൽ മാർച്ച് 29 വരെ പൊതു അവധി പ്രഖ്യാപിച്ചു. കൊറോണ വൈറസ് ബാധയെ തടയുന്നതിന്റെ ഭാഗമായി ചേർന്ന അടിയന്തിര മന്ത്രി സഭായോഗമാണു തീരുമാനം പ്രഖ്യാപിച്ചത്. ഇത് പ്രകാരം രാജ്യത്തെ മുഴുവൻ സർക്കാർ സ്ഥാപനങ്ങൾക്കും പൊതുമേഖലാ സ്ഥാപനങ്ങൾക്കും ഈ കാലയളവിൽ അവധി ആയിരിക്കും. എന്നാൽ സ്വകാര്യ സ്ഥാപനങ്ങൾക്ക് അവധി ബാധകമാണൊ എന്ന് വ്യക്തമല്ല. അടുത്ത അറിയിപ്പ് ഉണ്ടാകുന്നത് വരെ വെള്ളിയാഴ്ച മുതൽ രാജ്യത്ത് നിന്നുള്ള മുഴുവൻ വാണിജ്യ വിമാന സർവീസുകളും താൽക്കാലികമായി നിർത്തി വെക്കുവാനും മന്ത്രി സഭാ യോഗം തീരുമാനിച്ചു. രാജ്യത്ത് കർഫ്യൂ ഏർപ്പെടുത്തുന്നതിനായി സോഷ്യൽ മീഡിയയിൽ പ്രചരിക്കുന്ന കാര്യങ്ങൾ ശരിയല്ലെന്നും സർക്കാർ വക്താവ് മൂസറാം വ്യക്തമാക്കി.
