പത്തനംതിട്ട : ജി.എസ്.ടി ഉദ്യോഗസ്ഥരുടെ വ്യാപാരി പീഡനത്തിനെതിരെ കേരളാ വ്യാപാരി വ്യവസായി ഏകോപനസമിതി സംസ്ഥാന കമ്മിറ്റിയുടെ ആഹ്വാനപ്രകാരം പത്തനംതിട്ട ജില്ലാക്കമ്മിറ്റിയുടെ നേത്രുത്വത്തില് ജി.എസ്.ടി ഓഫീസുകളിലേക്ക് മാര്ച്ചും ധര്ണയും നടത്തുന്നു. വ്യാഴാഴ്ച രാവിലെ 10 മണിക്ക് പത്തനംതിട്ട ജി.എസ്.ടി ഓഫീസിനു മുമ്പില് നടക്കുന്ന ധര്ണ്ണ ജില്ലാ പ്രസിഡന്റ് ഏ.ജെ ഷാജഹാന് ഉദ്ഘാടനം ചെയ്യും.
കേരളത്തില് വ്യാപാരികള്ക്കും വ്യവസായികള്ക്കും സൗഹൃദ അന്തരീക്ഷമാണെന്ന് കൂടെക്കൂടെ കൊട്ടിഘോഷിക്കുകയാണ് സര്ക്കാര്. സര്ക്കാരിന്റെ വാക്ക് കേട്ട് കേരളത്തില് വ്യാപാരമോ വ്യവസായമോ തുടങ്ങിയാല് അയാളെ പൂട്ടിക്കെട്ടിക്കുവാന് കാത്തിരിക്കുകയാണ് ഉദ്യോഗസ്ഥര്. കാടന് നിയമങ്ങളും ഭീഷണികളും നേരിട്ടുകൊണ്ട് കേരളത്തില് ഒരു വ്യവസായിയും തുടരില്ല. വ്യാപാരികളെ കറവപ്പശുവായി കാണുന്ന സര്ക്കാര് നിലപാട് മാറ്റിയേ മതിയാകൂ. മേലുദ്യോഗസ്ഥന് നല്കിയ ക്വോട്ട തികക്കാന് കടകളില് കയറി നിരങ്ങുകയാണ് ജി.എസ്.ടി ഉദ്യോഗസ്ഥര്. കുറ്റമില്ലെങ്കിലും ഏതുവിധേനയും വ്യാപാരിയെ കുടുക്കണം എന്ന ലക്ഷ്യത്തോടുകൂടിയാണ് ഉദ്യോഗസ്ഥരുടെ കട പരിശോധന.
പരിശോധനക്ക് മുമ്പ് കടകളില് കയറി എന്തെങ്കിലും സാധനം വാങ്ങുകയും ബില്ല് വാങ്ങാതെ തിരക്ക് അഭിനയിച്ച് പുറത്തേക്ക് പോവുകയും ചെയ്തിട്ട് വ്യാപാരി ബില്ല് നല്കിയില്ല എന്ന് പറഞ്ഞ് 20000 രൂപ ഫൈന് ഇടാക്കുന്ന നാടകമാണ് ഇപ്പോള് കേരളത്തില് അരങ്ങേറുന്നത്. നേരും നെറിയുമില്ലാത്ത ഈ നടപടിക്കെതിരെ ശക്തമായ സമരപരിപാടികളുമായി മുമ്പോട്ടുപോകുമെന്ന് ജില്ലാ പ്രസിഡന്റ് ഏ.ജെ ഷാജഹാന്, ജനറല് സെക്രട്ടറി കെ.ഇ മാത്യു, ട്രഷറര് കൂടല് ശ്രീകുമാര് എന്നിവര് പറഞ്ഞു.
