പത്തനംതിട്ട : ലോക്ക് ഡൌണ് ഇളവുകളുമായി ബന്ധപ്പെട്ടുള്ള പ്രായോഗികമല്ലാത്ത നിര്ദ്ദേശങ്ങള് പിന്വലിക്കണമെന്ന് കേരള വ്യാപാരി വ്യവസായി ഏകോപന സമിതി യൂത്ത് വിങ് പത്തനംതിട്ട ജില്ലാ പ്രസിഡണ്ട് വി എസ് ഷജീര് ആവശ്യപ്പെട്ടു. അശാസ്ത്രീയമായ ലോക്ക് ഡൌണ് നിയമങ്ങള് മൂലം കടകള് കഴിഞ്ഞ ഒന്നര വര്ഷമായി അടച്ചിട്ടിരിക്കുകയാണ്. എല്ലാകടകളും തുറക്കുവാന് അനുവാദം തന്നെങ്കിലും ആരും കടയില് വരേണ്ട എന്ന നിലപാടാണ് സര്ക്കാരിന്റെത്.
കടകള് തുറക്കുന്നത് സംബന്ധിച്ച് സര്ക്കാര് എടുത്ത തീരുമാനത്തെ സ്വാഗതം ചെയ്യുന്നുവെങ്കിലും ഈ ഉത്തരവിലെ അവ്യക്തത പരിഹരിക്കേണ്ടതുണ്ട്. നിലവിലെ സാഹചര്യത്തില് വ്യാപാരികള്ക്കും പൊതുജനത്തിനും പ്രായോഗികമായി നടപ്പിലാക്കാന് പറ്റാത്തതുമായ നിര്ദ്ദേശങ്ങളാണ് സര്ക്കാരിന്റെത്. കടകളില് വരുന്നവര് ആര്.ടി.പി.സി.ആര് ടെസ്റ്റോ വാക്സിനേഷനോ സ്വീകരിച്ചിട്ടുണ്ടോ എന്ന് കച്ചവടക്കാരന് നോക്കുന്നതിന് പ്രായോഗിക ബുദ്ധിമുട്ടുണ്ട്.
നിലവില് 60 വയസ്സിന് മുകളിലുള്ളവര്ക്കാണ് ഭൂരിഭാഗം വാക്സിനും ലഭിച്ചത്. മറ്റു വിഭാഗങ്ങളില്പ്പെട്ടവര്ക്ക് വാക്സിന് ദൗര്ലഭ്യം തുടരുകയാണ്. കച്ചവട സ്ഥാപനത്തിലെ മുഴുവന് പേരും വാക്സിനേഷന് സര്ട്ടിഫിക്കറ്റ് കൈവശം വയ്ക്കണമെന്ന് പറയുന്നത് ഇപ്പോഴത്തെ അവസ്ഥയില് നടപ്പിലാക്കാന് സാധിക്കില്ലെന്നും കെ.വി.വി.ഇ.എസ് യൂത്ത് വിങ് ഭാരവാഹികള് പറഞ്ഞു.