ഒരേ സമയം കുറഞ്ഞത് മൂന്നു ലാബുകളിലെങ്കിലും പരിശോധന നടത്തണം
പത്തനംതിട്ട: ലാബിലെ ടെസ്റ്റ് റിപ്പോര്ട്ടുകളുടെ വിശ്വാസ്യത നഷ്ടപ്പെടുന്നു. പലതും തട്ടിക്കൂട്ട് റിപ്പോര്ട്ടുകളെന്ന് സൂചന. രോഗം കണ്ടുപിടിക്കുന്നതിനും ശരിയായ ചികിത്സ നല്കുന്നതിനും കുറ്റമറ്റ രീതിയിലുള്ള ടെസ്റ്റ് റിപ്പോര്ട്ടുകള് അനിവാര്യമാണ്. എന്നാല് ഒട്ടുമിക്ക ലാബുകളും നല്കുന്നത് ശരിയായ പരിശോധനാഫലമല്ലെന്നത് ഞെട്ടല് ഉളവാക്കുന്ന കാര്യമാണ്. ടെസ്റ്റ് റിസല്ട്ടുകള് മാറുന്നതോടെ രോഗമില്ലാത്തവരും ചികിത്സക്ക് വിധേയമാകുന്നു. അനാവശ്യമായി ഉയര്ന്ന ഡോസിലുള്ള മരുന്ന് കഴിക്കെണ്ടാതായും വരുന്നു. ഷുഗര് ഇല്ലാത്തവര്ക്ക് കൂടിയ അളവില് ഷുഗറും തൈറോയിഡ് ഇല്ലാത്തവര്ക്ക് തൈറോയിഡും കൂടിയ ബ്ലഡ് പ്രഷറും കുറഞ്ഞ ബ്ലഡ് പ്രഷറുമൊക്കെ പല ലാബിന്റെയും റിസള്ട്ടില് കാണാം.
തങ്ങള് നല്കുന്ന പരിശോധനാ റിപ്പോര്ട്ടുകള് കുറ്റമറ്റതാണെന്ന് എല്ലാവരും പറയുന്നുണ്ട്. എന്നാല് പല ലാബുകളില്നിന്നും നല്കുന്ന ടെസ്റ്റ് റിപ്പോര്ട്ടുകള് ശരിയായ പരിശോധനയുടെ അടിസ്ഥാനത്തില് അല്ലെന്ന് അനുഭവസ്ഥര് പറയുന്നു. ഇതിന്റെ സത്യാവസ്ഥ മനസ്സിലാക്കണമെങ്കില് ഒരേ ദിവസം തന്നെ കുറഞ്ഞത് മൂന്നു ലാബുകളിലെങ്കിലും പരിശോധന നടത്തണം. ഈ റിപ്പോര്ട്ടുകള് താരതമ്യപഠനം നടത്തിയതിനുശേഷം മാത്രമേ ചികിത്സക്ക് തുനിയാവൂ എന്നാണ് ഈ രംഗത്തെ പ്രഗല്ഭരുടെ ഉപദേശം. ലാബുകളില് ഗുണനിലവാരം ഉറപ്പാക്കുന്ന ഒരു നടപടിയും നിലവില് സര്ക്കാര് ഭാഗത്തുനിന്നും ഉണ്ടാകുന്നില്ല. ലാബുകള് തമ്മിലുള്ള അനാരോഗ്യകരമായ കിടമല്സരവും തട്ടിക്കൂട്ട് റിപ്പോര്ട്ടുകള്ക്ക് കാരണമാകുന്നുണ്ട്.
