മുംബെെ : കൊറോണ വൈറസിന്റെ പശ്ചാതലത്തിൽ രാജ്യം 21 ദിവസത്തെ ലോക്ഡൌൺ പ്രഖ്യാപിച്ചിരിക്കുകയാണ്. ആളുകൾ അവശ്യ കാര്യങ്ങൾക്ക് മാത്രമേ പുറത്തിറങ്ങാൻ പാടുള്ളു എന്നാണ് നിർദ്ദേശങ്ങൾ. എന്നാൽ ഒഴിഞ്ഞു കിടക്കുന്ന നഗരങ്ങളും പാതകളും കാണുമ്പോൾ ആർക്കാണ് ഒന്ന് സെൽഫി എടുക്കാൻ തോന്നാത്തത് അല്ലെ. പ്രത്യേകിച്ച് സോഷ്യൽ മീഡിയയിൽ വൈറലാകാൻ വേണ്ടി എന്തും ചെയ്യാൻ പറ്റും എന്ന അവസ്ഥയിൽ അല്ലേ?
അത്തരത്തിൽ ഒരു വീഡിയോയാണ് ഇപ്പോൾ സമൂഹ മാധ്യമങ്ങളിൽ വൈറലാകുന്നത്. ലോക്ഡൌൺ സമയത്ത് ഒഴിഞ്ഞ നിരത്തിൽ വെച്ച് സെൽഫി എടുക്കുന്ന പെൺകുട്ടികളെയാണ് ദൃശ്യങ്ങളിൽ കാണുന്നത്. എന്നാൽ അവിടേക്കെത്തിയ പോലീസ് പെൺകുട്ടികളെ തല്ലി ഓടിക്കുന്നതും കാണാം. @Mumbaikhabar9 എന്ന ട്വിറ്റർ ഹാൻഡിലിൽ നിന്നുള്ള വീഡിയോ നിരവധി പേരാണ് ഏറ്റെടുത്തിരിക്കുന്നത്.
രണ്ട് പെൺകുട്ടികളാണ് നിരത്തിലുള്ളത്. ഒരാൾ ഫോണിൽ സെൽഫി പകർത്തുകയും മറ്റെ ആൾ തൊട്ടടുത്തിരിക്കുന്നതും കാണാം. രണ്ടുപേരിൽ ഒരാൾ മാസ്ക് ധരിച്ചിട്ടുണ്ട്. എന്നാൽ പോലീസ് അടുത്തെത്തുമ്പോൾ അടുത്ത് തന്നെയാണ് വീട് എന്ന് ചൂണ്ടിക്കാട്ടുന്നതും ദൃശ്യങ്ങളിൽ കാണാം. രണ്ട് അടി കൊടുത്ത ശേഷമാണ് പോലീസ് പെൺകുട്ടികളെ വിട്ടത്.
