കൊല്ലം: പ്രസവത്തെ തുടര്ന്ന് യുവതി മരിച്ചതിന് പിന്നാലെ കുഞ്ഞും മരിച്ചു. തിങ്കളാഴ്ചയാണ് മൈലക്കാട് സ്വദേശി വിപിന്റെ ഭാര്യ ഹര്ഷ മരിച്ചത്. കൊല്ലത്തെ തന്നെ മറ്റൊരു സ്വകാര്യ ആശുപത്രിയില് ചികിത്സയിലായിരുന്ന കുഞ്ഞ് ഇന്ന് ഉച്ചയോടെയാണ് മരിച്ചത്. അഷ്ടമുടി സഹകരണ ആശുപത്രിയിലെ ചികിത്സാ പിഴവാണ് ഹര്ഷയുടെ മരണകാരണമെന്നാണ് ബന്ധുക്കളുടെ ആരോപണം.
പ്രസവത്തിന് തൊട്ടുമുമ്പ് യുവതിയുടെ ആരോഗ്യനില മോശമായിരുന്നു. ഇതേ തുടര്ന്ന് ശസ്ത്രക്രിയയിലൂടെ കുഞ്ഞിനെ പുറത്തെടുത്തു. ഹര്ഷയുടെ ആരോഗ്യനില വഷളായതിനെ തുടര്ന്ന് കൊല്ലത്തെ തന്നെ മറ്റൊരു സ്വകാര്യ ആശുപത്രിയിലേക്ക് മാറ്റുന്നതിനിടയില് യുവതി മരിച്ചു. യുവതിയുടെ ആരോഗ്യനില മോശമായിട്ടും ഡോക്ടര്മാര് ആദ്യം വിവരം മറച്ചുവെച്ചുവെന്നും കുടുംബം പറയുന്നു.
കുഞ്ഞിനെ സ്വകാര്യ ആശുപത്രിയില് ചികിത്സിച്ചെങ്കിലും രക്ഷിക്കാനായില്ല. ആശുപത്രിക്കെതിരെ ആരോപണം ഉയര്ന്ന് വന്നതോടെ കോണ്ഗ്രസ് പ്രവര്ത്തകര് അഷ്ടമുടി സഹകരണ ആശുപത്രിയിലേക്ക് പ്രതിഷേധ മാര്ച്ച് നടത്തി. കുടുംബത്തിന്റെ ആരോപണം ആശുപത്രി അധികൃതര് നിഷേധിച്ചു. ഹര്ഷയുടെ മരണകാരണം ഹൃദയാഘാതമാണെന്നും മറ്റൊരു ആശുപത്രിയിലേക്ക് യുവതിയെ മാറ്റാന് വൈകിയില്ലെന്നുമാണ് അഷ്ടമുടി സഹകരണ ആശുപത്രിയുടെ വിശദീകരണം.
