ജയ്പൂര് : ഓക്സിജന് കോണ്സെന്ട്രേറ്റര് പൊട്ടിത്തെറിച്ച് യുവതിക്ക് ദാരുണാന്ത്യം. അപകടത്തില് ഭര്ത്താവിന് ഗുരുതരമായി പരിക്കേറ്റു. രാജസ്ഥാനില് ഗംഗാപൂരിലെ ഉദയ്മോറിലാണ് ഞെട്ടിക്കുന്ന സംഭവം. രണ്ടു മാസങ്ങള്ക്ക് മുമ്പാണ് ഐ.എ.എസ് ഉദ്യോഗസ്ഥനായ ഹര്സഹായ് മീണയുടെ സഹോദരനായ സുല്ത്താന് സിങ്ങിന് കോവിഡ് രോഗം ബാധിച്ചത്. ശ്വാസതടസം കടുത്തതോടെയാണ് ഓക്സിജന് കോണ്സെന്ട്രേറ്റര് ഉപയോഗിച്ച് തുടങ്ങിയത്. ഗേള്സ് ഹൈസ്കൂളില് ഹെഡ്മിസ്ട്രസ് ആയിരുന്ന ഭാര്യ സന്തോഷ് മീണയായിരുന്നു സിങ്ങിനെ ശുശ്രൂഷിച്ചത് .
ശനിയാഴ്ചയാണ് ദാരുണ സംഭവം. രാവിലെ മീണ ലൈറ്റ് ഓണ് ചെയ്തതും ഓക്സിജന് കോണ്സെന്ട്രേറ്റര് പൊട്ടിത്തെറിക്കുകയായിരുന്നു. ഇരുവരെയും ആശുപത്രിയിലേക്ക് കൊണ്ടുപോകുന്ന വഴിയാണ് മീണയുടെ ജീവന് നഷ്ടപ്പെട്ടത്. ജയ്പൂരില് വിദഗ്ധ ചികിത്സക്കായി കൊണ്ടുപോയ സുല്ത്താന് സിങ്ങിന്റെ ആരോഗ്യനില ഗുരുതരമായി തുടരുകയാണ്.
ദമ്പതികളുടെ 10, 12 വയസ് പ്രായമുള്ള ആണ്കുട്ടികള് അപകടം നടന്ന സമയത്ത് വീട്ടില് ഇല്ലായിരുന്നു. കേസ് രജിസ്റ്റര് ചെയ്ത പൊലീസ് ഓക്സിജന് കോണ്സെന്ട്രേറ്റര് വിതരണം ചെയ്ത കടക്കാരനെ ചോദ്യം ചെയ്തു. പ്രാഥമിക പരിശോധനയില് ഉപകരണത്തിന്റെ കംപ്രസര് പൊട്ടിത്തെറിച്ചതായാണ് പോലീസ് കണ്ടെത്തിയത്.
