ചെങ്ങമനാട് : ജോലിക്കു പോകാന് ദേശീയപാത മുറിച്ചു കടക്കുന്നതിനിടെ വീട്ടമ്മ ബൈക്കിടിച്ച് മരിച്ചു. ചെങ്ങമനാട് പുതുവാശ്ശേരി ഇലവുങ്കല് പറമ്പില് വീട്ടില് പരേതനായ മണിയുടെ ഭാര്യ സതിയാണ് (52) മരിച്ചത്. റോഡില് തെറിച്ച് വീണ ബൈക്ക് യാത്രികനെ ഗുരുതര പരിക്കുകളോടെ ആശുപത്രിയില് പ്രവേശിപ്പിച്ചു.
കൊല്ലം കുമ്പളം ‘മാനസം’ വീട്ടില് ലിതിനാണ് (25) സാരമായി പരിക്കേറ്റത്. ചെങ്ങമനാട് കോട്ടായിയില് ബുധനാഴ്ച പുലര്ച്ചെയായിരുന്നു അപകടം. കൂലിപ്പണിക്കാരിയായ സതി വീട്ടില് നിന്ന് പുതുവാശ്ശേരി റോഡിലൂടെ മറുവശത്തെ ട്രാക്കിലെ ബസ് സ്റ്റോപ്പ് ലക്ഷ്യമാക്കി ദേശീയപാത മുറിച്ചു കടക്കുന്നതിനിടെയാണ് ആലുവ ഭാഗത്ത് നിന്ന് അതിവേഗത്തില് വന്ന ബൈക്ക് ഇടിച്ചു തെറിപ്പിച്ചത്.
ഇടിയുടെ ആഘാതത്തില് ഇരുവരും ദൂരെ തെറിച്ചു വീണു. തലകുത്തി കറങ്ങി വീണ ലിതിന്റെ കഴുത്തില് ഹെല്മറ്റ് കുരുങ്ങിക്കിടന്നു. അവശനിലയിലായ ഇരുവരെയും ദേശം സി.എ ആശുപത്രിയില് പ്രവേശിപ്പിച്ച ശേഷം നിതിന്റെ തലയില് നിന്ന് ഹെല്മറ്റ് വേര്പ്പെടുത്തി. ഇരുവരുടെയും നില ഗുരുതരമായതോടെ വിദഗ്ധ ചികിത്സക്കായി എറണാകുളത്തെ സ്വകാര്യ ആശുപത്രിയിലേക്ക് അയച്ചെങ്കിലും വഴിമധ്യേ സതി മരണപ്പെടുകയായിരുന്നു.
അവശനിലയിലായ നിതിനെ ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിച്ചിരിക്കുകയാണ്. നിതിന് കൊല്ലത്ത് നിന്ന് ബൈക്കില് അങ്കമാലി ഭാഗത്ത് പരീക്ഷ എഴുതാന് എത്തിയതാണെന്നാണ് അറിയുന്നത്. മരിച്ച സതിയുടെ മൃതദേഹം പോസ്റ്റ് മോര്ട്ടത്തിന് ശേഷം സംസ്കരിച്ചു. മക്കള്, സനേഷ്, സരിത. മരുമക്കള്: അമൃത, നിജു.
