മറയൂര്: ഇടുക്കി മറയൂരിന് സമീപം യുവതി വെടിയേറ്റ് മരിച്ചു. പാണപ്പെട്ടിക്കുടിയില് ചന്ദ്രിക (34) ആണ് മരിച്ചത്. സഹോദരിയുടെ മകന് കാളിയപ്പനാണ് വെടിവച്ചത്. ചന്ദനത്തടി മോഷ്ടിച്ചത് ചന്ദ്രിക പുറത്തു പറഞ്ഞതാണ് കൃത്യത്തിനു കാരണം. ഇന്നലെ രാത്രിയില് ഇതേച്ചൊല്ലി വാക്കുതര്ക്കം ഉണ്ടാകുകയും കാളിയപ്പന് നാടന് തോക്ക് ഉപയോഗിച്ച് വെടിയുതിര്ക്കുകയും ചെയ്തെന്നാണ് പ്രദേശവാസികള് പറയുന്നത്. ചന്ദനത്തടി മുറിച്ചു കടത്തിയ കേസിലെ പ്രതിയാണ് ഇയാളെന്നു പോലീസ് പറയുന്നു. സംഭവത്തില് ഇയാളടക്കം മൂന്നു പേര് പിടിയിലായി. കാളിയപ്പന്, മണികണ്ഠന്, മാധവന് എന്നിവരാണ് കസ്റ്റഡിയിലുള്ളത്. മൂവരും ചന്ദനമോഷണക്കേസ് പ്രതികളാണ്. ഇവരെ ചോദ്യം ചെയ്യുന്നു.
