മാന്നാര് : നാലു വയസുകാരനായ മകനെ തിരിച്ചുകിട്ടാന് പോലീസ് സ്റ്റേഷനു മുന്നില് യുവതിയുടെ സമരം. ഒടുവില് പോലീസ് ഇടപെടലില് കുഞ്ഞിനെ യുവതിക്ക് തിരികെ കിട്ടി. ബുധനൂര് തയ്യൂര് ആനന്ദഭവനത്തില് വാടകക്ക് താമസിക്കുന്ന 26 കാരിയായ സ്നേഹയാണ് തന്റെ മകന് അശ്വിനെ (നാല്) വിട്ടുകിട്ടാത്തതിനെത്തുടര്ന്ന് പ്രതിഷേധവുമായി മാന്നാര് പോലീസ് സ്റ്റേഷന് മുന്നിലെത്തിയത്. ക്രിസ്മസ് ദിനത്തില് രാവിലെ മുതല് സ്റ്റേഷന് മുന്നില് നില്ക്കുകയായിരുന്നു യുവതി. രാത്രിയോടെ പോലീസ് ഇടപെടലില് കുട്ടിയെ നല്കിയതോടെയാണ് ഇവര് മടങ്ങിയത്. ബുധനൂര് കിഴക്ക് കോടഞ്ചിറ മനോജ് ഭവനത്തില് സുനിലുമായി 2014 ലായിരുന്നു സ്നേഹയുടെ രജിസ്റ്റര് വിവാഹം. ആദ്യ കുഞ്ഞ് ഗര്ഭസ്ഥ ശിശുവായിരിക്കെ മരിച്ചു. പിന്നീട് അശ്വിന് ജനിച്ചതിന് പിന്നാലെ ഭര്ത്താവ് സുനില് ഗള്ഫിലേക്ക് ജോലിക്ക് പോയി.
അടൂര് കെ.എസ്.ആര്.ടി. സിയില് കോവിഡ് വളന്റിയറായി സേവനമനുഷ്ഠിക്കാന് തുടങ്ങിയതോടെ കുഞ്ഞിനെ ഭര്തൃവീട്ടുകാര് കൊണ്ടുപോവുകയും ഭര്ത്താവടക്കമുള്ളവരോട് തന്നെപ്പറ്റി അപവാദം പറഞ്ഞു പരത്തുകയും ചെയ്തുവെന്നാണ് സ്നേഹ പറയുന്നത്. പിന്നീട് കുഞ്ഞിനെ കാണാന്പോലും സ്നേഹയെ അനുവദിച്ചില്ല. 2020 ജൂണില് മാന്നാര് പോലീസില് പരാതിപ്പെട്ടെങ്കിലും നടപടിയുണ്ടായില്ല. തുടര്ന്ന് ചെങ്ങന്നൂര് ഡിവൈ.എസ്.പിയെ സമീപിച്ചപ്പോള് ഇരുകൂട്ടരെയും മാന്നാര് സി.ഐ ഒത്തുതീര്പ്പിന് വിളിപ്പിക്കുകയും രണ്ടുമാസം കഴിഞ്ഞ് ഭര്ത്താവ് എത്തുമ്പോള് പരിഹാരം കാണാമെന്നുപറഞ്ഞ് വിടുകയുമായിരുന്നു. കുട്ടിയെ തിരികെക്കിട്ടാതെ പോകില്ലെന്ന് പറഞ്ഞ് യുവതി ശനിയാഴ്ച സ്റ്റേഷന് പുറത്ത് നിന്നതോടെ ഗത്യന്തരമില്ലാതെ മാന്നാര് സി.ഐയുടെ നേതൃത്വത്തിലുള്ള പോലീസ് സംഘം രാത്രി പതിനൊന്നോടെ സ്നേഹയെയും കൂട്ടി ഭര്തൃവീട്ടിലെത്തി മകനെ വീണ്ടെടുത്ത് സ്റ്റേഷനില് കൊണ്ടുവന്ന് വ്യവസ്ഥകളോടെ കൈമാറുകയായിരുന്നു.
