കൊട്ടാരക്കര : താലൂക്കാശുപത്രി വികസനത്തിനായി ആശുപത്രിയോടു ചേര്ന്ന സ്വകാര്യഭൂമി ഏറ്റെടുക്കാന് ധാരണയായി. 50 സെന്റിലധികം വരുന്ന ഭൂമിയാണ് ഏറ്റെടുക്കുക. വസ്തു ഉടമയുമായി ഇതുസംബന്ധിച്ച ധാരണയായതോടെ 91 കോടിയുടെ ആശുപത്രി നവീകരണ പ്രവര്ത്തനങ്ങള്ക്ക് വേഗംവെയ്ക്കും. നിര്മാണത്തിനു തടസ്സമായിരുന്ന മണ്ണ് നീക്കം കഴിഞ്ഞ ദിവസം പുനരാരംഭിച്ചു. ഏറ്റെടുക്കാന് നിശ്ചയിച്ചിരിക്കുന്ന ഭൂമിയിലേക്കാണ് താത്കാലികമായി മണ്ണ് നീക്കുന്നത്. ഇതോടെ മാസങ്ങളായി മുടങ്ങിയ നിര്മാണം പുനരാരംഭിക്കാന് വഴിതെളിഞ്ഞു.
മണ്ണ് നീക്കംചെയ്യാതിരുന്നത് വലിയ പ്രതിസന്ധിയായിരുന്നു. മന്ത്രി കെ.എന്.ബാലഗോപാല് ഉള്പ്പെടെയുള്ളവര് നടപടികള് വേഗത്തിലാക്കാന് നിര്ദേശം നല്കിയിരുന്നു. തുടര്ന്നാണ് ഭൂമി ഏറ്റെടുക്കാനുള്ള ശ്രമങ്ങള് വേഗത്തിലായതും വസ്തു ഉടമയുമായി ധാരണയിലെത്തിയതും. മണ്ണ് നീക്കംചെയ്യുന്നതോടെ ഇവിടെ കെട്ടിടസമുച്ചയ നിര്മാണം തുടങ്ങും. ഇവിടെയാണ് എട്ട് നിലയിലുള്ള വാര്ഡ് ടവര് ഉയരുന്നത്.
