കാസര്കോട് : കാസര്കോട്ട് ഉരുള്പൊട്ടി ജനവാസമേഖലയിലേക്ക് വെള്ളമൊഴുകി. വെള്ളരിക്കുണ്ട് താലൂക്കില് ബളാല് വില്ലേജില് ചുള്ളി മേഖലയില് വനത്തിലാണ് ഉരുള്പൊട്ടിയതായി സംശയിക്കുന്നത്. ജനവാസമേഖലയിലേക്ക് വെള്ളം കുത്തിയൊലിച്ചു വരുന്നുണ്ട്. മലവെള്ളപ്പാച്ചിലില് മണ്ണിടിഞ്ഞ് മരുതോം-മാലോം മലയോര പാതയില് ഗതാഗതം തടസ്സപ്പെട്ടു. റോഡുകള്ക്ക് നാശം സംഭവിച്ചിട്ടുണ്ട്. ആളപായമോ പരിക്കോ റിപ്പോര്ട്ട് ചെയ്തിട്ടില്ല. ഇരുപതോളം കുടുംബങ്ങളെ ചുള്ളി സ്കൂളിലേക്ക് മാറ്റാനുള്ള നടപടി സ്വീകരിച്ചിട്ടുണ്ട്. തഹസില്ദാര്, വില്ലേജ് ഓഫിസര്, പഞ്ചായത്ത് പ്രസിഡന്റ് എന്നിവര് സ്ഥലത്തെത്തി. ഉരുള്പൊട്ടിയ ഭാഗം കൃത്യമായി അറിയാനുള്ള പരിശ്രമത്തിലാണ് അധികൃതര്. പ്രദേശത്ത് കനത്ത ജാഗ്രത നിര്ദേശം നല്കി.
