ന്യൂഡല്ഹി : മരിച്ചവരുടെ ആധാര് റദ്ദാക്കാന് നിയമഭേദഗതിക്കൊരുങ്ങി കേന്ദ്ര സര്ക്കാര്. മരണ രജിസ്ട്രേഷനില് ആധാര് ഉള്പ്പെടുത്താനാണ് നീക്കം. ലോക്സഭയിലാണ് കേന്ദ്ര സര്ക്കാര് ഇക്കാര്യം വ്യക്തമാക്കിയത്. നിലവില് മരിച്ചവരുടെ ആധാര് റദ്ദാക്കാന് സംവിധാനങ്ങളില്ല. അതിനാല് മരിച്ചവരുടെ കാര്ഡുകള് ദുരുപയോഗം ചെയ്യുമെന്നും ആശങ്ക ഉയര്ന്നിരുന്നു. അതിന് പിന്നാലെയാണ് കേന്ദ്രം നിയമ ഭേദഗതിക്ക് ഒരുങ്ങുന്നത്.
ഒരാള് മരിച്ച ശേഷം ബന്ധുക്കള്ക്ക് ആ വിവരം ആധാര് അതോറിറ്റിയെ അറിയിക്കാനും സംവിധാനമില്ല. 1969ലെ ജനന- മരണ രജിസ്ട്രേഷന് നിയമത്തിലാണ് ഭേദഗതിക്കു ശ്രമിക്കുന്നത്. ഇതിനായി രജിസ്ട്രാര് ജനറല് ഓഫ് ഇന്ത്യ ആധാര് അതോറിറ്റിയോട് നിര്ദേശങ്ങള് തേടിയെന്ന് അടൂര് പ്രകാശിന്റെ ചോദ്യത്തിന് മറുപടിയായി മന്ത്രി രാജീവ് ചന്ദ്രശേഷര് അറിയിച്ചു.
ഭേദഗതിക്കു ശേഷം മരണ രജിസ്ട്രേഷനില് ആധാര് നമ്പറും ഉള്പ്പെടുത്തും. രജിസ്ട്രാര് ഈ വിവരം ആധാര് അതോറിറ്റിക്കു കൈമാറുകയും കാര്ഡ് റദ്ദാക്കുകയും ചെയ്യുമെന്ന് മന്ത്രി അറിയിച്ചു. നിലവില് ജനന- മരണ രജിസ്ട്രേഷനുകള് ഓരോ സംസ്ഥാനത്തിന്റേയും പ്രത്യേക സോഫ്റ്റ്വെയര് ഉപയോഗിച്ചാണ് രേഖപ്പെടുത്തുന്നത്. ഇതിലും ഏകീകരണം വേണ്ടിവരും.
