ഏറ്റുമാനൂര്‍ : തെരഞ്ഞെടുപ്പ് പോസ്റ്ററുകള്‍ വ്യാപകമായി നശിപ്പിക്കുന്നതിനെതിരെ പരാതിയുമായി ഏറ്റുമാനൂരിലെ സ്വതന്ത്ര സ്ഥാനാര്‍ഥി ലതിക സുഭാഷ്. ചെങ്ങളം, ഒളശ മേഖലകളിലാണ് ലതിക സുഭാഷിന്റെ പോസ്റ്ററുകള്‍ നശിപ്പിച്ചത്.
മറ്റ് സ്ഥാനാര്‍ഥികളെ അപേക്ഷിച്ച്‌ വളരെ കുറച്ച്‌ പോസ്റ്ററുകള്‍ മാത്രമാണ് ലതികാ സുഭാഷ് പ്രിന്റ് ചെയ്തിരുന്നത്. സാമ്പത്തിക പ്രശ്നം ഉള്ളതിനാല്‍ അത്യാവശ്യം വേണ്ട സ്ഥലങ്ങളില്‍ മാത്രമാണ് പോസ്റ്റര്‍ പതിച്ചിരുന്നത്. ഈ പോസ്റ്ററുകളാണ് വ്യാപകമായി നശിപ്പിക്കപ്പെടുന്നത്. മറ്റ് സ്ഥാനാര്‍ഥികളുടെ പോസ്റ്ററുകള്‍ ഒട്ടിക്കാന്‍ വരുന്നവര്‍ മനപ്പൂര്‍വം തന്റെ പോസ്റ്ററുകള്‍ നശിപ്പിക്കുകയാണെന്നാണ് ലതികാ സുഭാഷിന്റെ പരാതി.
കോണ്‍ഗ്രസ് സീറ്റ് നിഷേധിച്ചതിനെ തുടര്‍ന്നാണ് ലതികാ സുഭാഷ് സ്വതന്ത്ര സ്ഥാനാര്‍ഥിയായി ഏറ്റുമാനൂരില്‍ മത്സരിക്കാന്‍ ഇറങ്ങിയത്. ഈ നീക്കം യുഡിഎഫിന് വലിയ തലവേദന ആവുകയും ചെയ്തിട്ടുണ്ട്. ലതികാ സുഭാഷ് കൂടി മത്സരിക്കാന്‍ വന്നതോടെ ഏറ്റുമാനൂരില്‍ ത്രികോണ മത്സരമാണ് നടക്കുന്നത്.
