കൊല്‍ക്കത്ത : ബംഗാളിലെ ഭവാനിപുരില്‍ നടക്കുന്ന ഉപതെരഞ്ഞെടുപ്പില്‍ മുഖ്യമന്ത്രി മമത ബാനര്‍ജിയെ നേരിടാന്‍ അഭിഭാഷകയായ പ്രിയങ്ക തിബ്രെവാളിനെ രംഗത്തിറക്കി ബിജെപി. മുന്‍ കേന്ദ്രമന്ത്രി ബാബുല്‍ സുപ്രിയോയുടെ നിയമോപദേശകയായ പ്രിയങ്ക കഴിഞ്ഞ നിയമസഭാ തെരഞ്ഞെടുപ്പില്‍ മത്സരിച്ചെങ്കിലും തൃണമൂല്‍ സ്ഥാനാര്‍ഥിയോടു പരാജയപ്പെട്ടിരുന്നു. 2014-ലാണു ബിജെപിയില്‍ അംഗമായത്.
കഴിഞ്ഞ തെരഞ്ഞെടുപ്പില്‍ നന്ദിഗ്രാമില്‍ സുവേന്ദു അധികാരിയോട് 1956 വോട്ടിനു പരാജയപ്പെട്ട മമത പിന്നീട് മുഖ്യമന്ത്രിയായി ചുമതലയേല്‍ക്കുകയായിരുന്നു. ഭവാനിപുരിലെ മത്സരം അവര്‍ക്കു നിര്‍ണായകമാണ്. ശ്രീജിബ് ബിശ്വാസ് ആണ് ഇടതു സ്ഥാനാര്‍ഥി. ഇവിടെ മമതയ്‌ക്കെതിരെ സുവേന്ദു അധികാരിയെ മത്സരിപ്പിക്കില്ലെന്നു ബിജെപി വ്യക്തമാക്കിയിരുന്നു.
സുവേന്ദു ഒരു തവണ മമതയെ തോല്‍പ്പിച്ചയാളാണെന്നും എന്തിനാണ് ഒരു വ്യക്തിതന്നെ പല തവണ അവരെ തോല്‍പ്പിക്കുന്നതെന്നും ബംഗാള്‍ ബിജെപി അധ്യക്ഷന്‍ ദിലീപ് ഘോഷ് പ്രതികരിച്ചു. ഭവാനിപുരില്‍ ഉപതെരഞ്ഞെടുപ്പ് നടത്താനുള്ള തെരഞ്ഞെടുപ്പ് കമ്മിഷന്റെ തീരുമാനത്തിനെതിരെ കല്‍ക്കട്ട ഹൈക്കോടതിയെ സമീപിക്കുമെന്നും ബിജെപി പറഞ്ഞിരുന്നു.
മേയ് 5ന് മുഖ്യമന്ത്രിയായി ചുമതലയേറ്റ മമത നവംബര്‍ 5നകം എംഎല്‍എ ആയില്ലെങ്കില്‍ രാജിവയ്‌ക്കേണ്ടിവരും. ഇതു ഭരണഘടനാപരമായ പ്രതിസന്ധിക്കിടയാക്കുമെന്നു ബംഗാള്‍ ചീഫ് സെക്രട്ടറി അറിയിച്ചതിനു പിന്നാലെയാണ് ഭവാനിപുര്‍ ഉള്‍പ്പെടെ ബംഗാളിലും ഒഡിഷയിലുമായി നാല് മണ്ഡലങ്ങളില്‍ ഈ മാസം 30ന് തെരഞ്ഞെടുപ്പ് നടത്തുമെന്ന് തെരഞ്ഞെടുപ്പ് കമ്മിഷന്‍ അറിയിച്ചത്. അടുത്തമാസം മൂന്നിനാണു വോട്ടെണ്ണല്‍. മമതയ്ക്കു വേണ്ടി ഭവാനിപുരിലെ തൃണമൂല്‍ എംഎല്‍എ സോവന്‍ദേവാണ് രാജിവെച്ചത്.
