അടൂർ : കർഷകർക്ക് താങ്ങും തണലുമായി മാറുവാന് ഓരോ കർഷക കോൺഗ്രസ് നേതാക്കളും തയ്യാറാകണമെന്ന് കർഷക കോൺഗ്രസ് സംസ്ഥാന ജനറൽ സെക്രട്ടറി പഴകുളം സതീഷ് പറഞ്ഞു. അടൂർ നിയോജക മണ്ഡലം പ്രവർത്തക സമ്മേളനം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. വന്യമൃഗങ്ങളുടെ ആക്രമണം മൂലവും പ്രകൃതിക്ഷോഭങ്ങള് മൂലവും കൃഷിനാശം സംഭവിക്കുന്ന കർഷകർക്ക് സഹായം എത്തിക്കുന്നതിനും കർഷകരുടെ പ്രശ്നങ്ങൾ നേരിട്ട് അറിഞ്ഞ് വേണ്ട പരിഹാരം കാണുന്നതിന് ഓരോ കർഷക കോൺഗ്രസ് നേതാക്കളും മാതൃകാപരമായി മുന്നിട്ടിറങ്ങണമെന്നും പഴകുളം സതീഷ് ആവശ്യപ്പെട്ടു.
കോൺഗ്രസിന്റെ പോഷക സംഘടനകളിൽ ഏറ്റവും പ്രധാനപ്പെട്ടതും കാര്യക്ഷമമായി പ്രവർത്തിക്കേണ്ടതുമായ ഒരു സംഘടനയാണ് കർഷക കോൺഗ്രസ്. കഴിഞ്ഞ പത്തുവർഷത്തെ ദുർഭരണത്തിനു ശേഷം കേരള ജനത ഒന്നടങ്കം തെരഞ്ഞെടുത്ത കോൺഗ്രസ് ഗവൺമെന്റിന് ഏറ്റവും കൂടുതൽ ജനങ്ങളുടെ അംഗീകാരം നേടിക്കൊടുക്കുന്ന ഒരു സംഘടനയായി കർഷക കോൺഗ്രസ് മാറണമെന്നും പഴകുളം സതീഷ് പറഞ്ഞു. കർഷക കോൺഗ്രസ് അടൂർ നിയോജകമണ്ഡലം പ്രസിഡന്റ് പി എസ് വേണുകുമാരൻ നായർ അധ്യക്ഷത വഹിച്ചു.
സംസ്ഥാന സെക്രട്ടറി ജോജി ഇടക്കുന്നിൽ, ജില്ലാ വൈസ് പ്രസിഡന്റ് മണ്ണിൽ രാഘവൻ, ജില്ലാ ജനറൽ സെക്രട്ടറിമാരായ കെ എൻ രാജൻ, വല്ലാറ്റൂർ വാസുദേവൻ പിള്ള, അംജത്ത് അടൂർ, ഇ എസ് നുജുമുദ്ധീൻ, പി പി ജോൺ, മാത്യൂസ് തോണ്ടലിൽ, ജെയിംസ് തുമ്പമൺ, ടോബി തോമസ്, ആർ ഗോപിനാഥ പിള്ള, ജോസ് പി ജോൺ, ശാന്തികൃഷ്ണ, ഷിനു വിജി എന്നിവര് സംസാരിച്ചു.
