പത്തനംതിട്ട : ഓണക്കാലത്തോട് അനുബന്ധിച്ച് ലീഗല് മെട്രോളജി വകുപ്പ് ജില്ലയില് പരിശോധന ശക്തമാക്കി. കഴിഞ്ഞ നാലു ദിവസം നടന്ന പരിശോധനകളില് 42 വ്യാപാര സ്ഥാപനങ്ങളില് ക്രമക്കേട് കണ്ടെത്തി 1.08 ലക്ഷം രൂപ പിഴ ഈടാക്കിയതായി ലീഗല് മെട്രോളജി ജില്ലാ ഓഫീസര് കെ.ആര്. വിപിന് അറിയിച്ചു. മുദ്ര പതിക്കാത്ത അളവുതൂക്ക ഉപകരണങ്ങള് ഉപയോഗിച്ചതിന് 24 വ്യാപാരികള്ക്കെതിരെയും നിയമപ്രകാരം ആവശ്യമായ രേഖപ്പെടുത്തല് ഇല്ലാത്ത പായ്ക്കറ്റുകള് വില്പനയ്ക്ക് പ്രദര്ശിപ്പിച്ചതിന് 14 വ്യാപാരികള്ക്കെതിരെയും പായ്ക്കറ്റില് രേഖപ്പെടുത്തിയിരുന്ന വില തിരുത്തിയതിന് ഒരാള്ക്കെതിരെയും തൂക്കത്തില് കുറച്ച് വില്പന നടത്തിയതിന് രണ്ടു വ്യാപാരികള്ക്കെതിരെയും കേസെടുത്തു.
ലീഗല് മെട്രോളജി കണ്ട്രോളര് ജോണ് വി സാമുവലിന്റെ നിര്ദേശ പ്രകാരം ഈ മാസം ഒന്നിന് ആരംഭിച്ച പരിശോധനകള് പലചരക്ക് കടകള്, പഴം, പച്ചക്കറി-മത്സ്യ മാര്ക്കറ്റുകള്, മൊത്തവ്യാപാര കേന്ദ്രങ്ങള്, സ്വര്ണക്കടകള്, ഗ്യാസ് ഏജന്സികള്, സൂപ്പര് മാര്ക്കറ്റുകള്, ഗൃഹോപകരണ വില്പ്പനശാലകള് തുടങ്ങി വിവിധ വ്യാപാര കേന്ദ്രങ്ങള് കേന്ദ്രീകരിച്ച് തുടരുന്നു. നിയമലംഘനം നടത്തുന്നവര്ക്കെതിരെ കര്ശന നടപടികള് സ്വീകരിക്കും.
