കോന്നി : എലിമുള്ളുംപ്ലാക്കൽ പേരുവാലി കൂപ്പിൽ പുലി ഇറങ്ങിയതായി അഭ്യൂഹം. കഴിഞ്ഞ ദിവസം വൈകീട്ട് അഞ്ച് മണിക്ക്‌ ശേഷം ആണ് പുലിയെ കണ്ടതായി നാട്ടുകാർ പറയുന്നത്. കൂപ്പിൽ തടികൾ കൊണ്ടുപോകുന്നതിനായി വനം വകുപ്പ് നിർമ്മിച്ച റോഡിലൂടെ ജന വാസ മേഖലയിലെ കൃഷിയിടത്തിലേക്ക് ആണ് പുലി നടന്നു പോകുന്നത് കണ്ടതായി പറയുന്നത്.
നായകളുടെ കുര കേട്ടാണ് പ്രദേശ വാസികൾ ശ്രദ്ധിച്ചത്. പുലി നടന്നു പോകുന്ന ദൃശ്യങ്ങൾ ആരോ മൊബൈൽ പകർത്തി സമൂഹ മാധ്യമങ്ങളിലും പ്രചരിപ്പിച്ചിരുന്നു. എന്നാൽ ഇത് പുലി ആണെന്ന് സ്ഥിരീകരിച്ചിട്ടില്ലെന്ന് വനം വകുപ്പ് അധികൃതർ പറഞ്ഞു. ഒരു മാസം മുൻപും ഇതിന് തൊട്ടടുത്തായി പുലിയെ കണ്ട് അന്യ സംസ്ഥാന തൊഴിലാളികൾ ഭയന്നോടിയിരുന്നു.
