പത്തനംതിട്ട : ദേശീയ കുഷ്ഠരോഗ നിര്മ്മാര്ജ്ജന പരിപാടിയുടെ ഭാഗമായി ഇതുവരെ കണ്ടുപിടിക്കപ്പെടാതെ ഒളിഞ്ഞുകിടക്കുന്ന രോഗത്തെ കണ്ടെത്തി ചികിത്സ ഉറപ്പുവരുത്തുന്നതിനായി നടപ്പിലാക്കുന്ന അശ്വമേധം ഗൃഹസന്ദര്ശന പരിപാടിയുടെ നാലാം ഘട്ടം പത്തനംതിട്ട ജില്ലയില് ആരംഭിച്ചതായി ജില്ലാ മെഡിക്കല് ഓഫീസര്(ആരോഗ്യം) ഡോ.എ.എല് ഷീജ അറിയിച്ചു. ഇതിനായി ജില്ലയിലെ മുഴുവന് വീടുകളിലും സന്ദര്ശനം നടത്തി കുഷ്ഠരോഗ ലക്ഷണങ്ങള് ഉള്ളവരെ കണ്ടെത്തുന്നതിനുവേണ്ടി 2348 സന്നദ്ധ പ്രവര്ത്തകര്ക്ക് പരിശീലനം നല്കിയിട്ടുണ്ട്. ഒരു പുരുഷനും സ്ത്രീയും അടങ്ങുന്ന 1174 സംഘങ്ങളായിട്ടാണ് ഭവന സന്ദര്ശനം നടത്തുന്നത്.
തൊലിപ്പുറത്തുള്ള നിറം മങ്ങിയ, ചുവപ്പുകലര്ന്ന സ്പര്ശന ശേഷികുറഞ്ഞ പാടുകളാണ് കുഷ്ഠരോഗത്തിന്റെ പ്രധാന ലക്ഷണം. ചൊറിച്ചിലോ വേദനയോ ഇല്ലാത്ത ഇത്തരം പാടുകള് ദീര്ഘകാലം നിലനില്ക്കുന്നവയാണ്. തുടക്കത്തില് ചികിത്സ ലഭ്യമാക്കിയാല് അംഗവൈകല്യം ഒഴിവാക്കുവന് സാധിക്കും.
ഭവന സന്ദര്ശനം നടത്തുമ്പോള് രോഗലക്ഷണങ്ങള് സംശയിക്കുന്നവരെ പ്രാഥമികാരോഗ്യ കേന്ദ്രങ്ങളിലേക്കു പരിശോധനയ്ക്ക് അയയ്ക്കുകയും ആവശ്യമെങ്കില് ത്വക്കുരോഗ വിദഗ്ധരുടെ സേവനം ഉപയോഗപ്പെടുത്തുകയും ചെയ്യും. രോഗപകര്ച്ച തടയുന്നതിനുള്ള പ്രവര്ത്തനങ്ങള് ഭവന സന്ദര്ശകസംഘങ്ങള് നടത്തുന്നു. നിലവില് ജില്ലയില് ആറു രോഗികള് ചികിത്സയില് ഉണ്ട്. ഈ മാസം 15 മുതല് 2022 ഫെബ്രുവരി 28 വരെ നടക്കുന്ന ഈ പരിപാടിയുടെ പ്രയോജനം പരമാവധി പ്രയോജനപ്പെടുത്തണമെന്ന് ഡി.എം.ഒ അറിയിച്ചു.
