അടൂര് : വേറിട്ട പ്രതിഷേധവുമായി വീട്ടമ്മ. ഏഴംകുളം വയലയില് വാടകയ്ക്കു താമസിക്കുന്ന കുഞ്ഞുമോളാണ് വളര്ത്തു നായയുടെ കൂട്ടില് ചെറുമക്കളെ ഇരുത്തി സമരം ചെയ്തത്. ഏനാദിമംഗലം പഞ്ചായത്ത് പടിക്കലായിരുന്നു സമരം. 2010 ലും 17 ലും ജില്ലാ കലക്ടര്ക്ക് പരാതി നല്കിയിട്ടും വീടു ലഭിച്ചില്ല. പല വാടക വീടുകളില് താമസിച്ചു വരികയായിരുന്നു. ഇതിനിടയില് എട്ടു മാസം മുന്പ് മകന് വാഹനാപകടത്തില് മരിച്ചു. മരുമകള് ജീവിതമാര്ഗം തേടി തമിഴ്നാട്ടില് ജോലി ചെയ്യുന്നു. എട്ടും ഒന്പതും വയസ്സുള്ള കുട്ടികളുടെ സംരക്ഷണവും കുഞ്ഞുമോളുടെ ചുമതലയിലാണ്. ഹൃദ്രോഗം പിടിപെട്ടതോടെ തൊഴില് ചെയ്യാനും കഴിയുന്നില്ല. വാടക കൊടുക്കാന് നിവൃത്തിയില്ലാത്തതിനാല് സ്വന്തമായി വീടു വേണം. ഇപ്പോള് ഏഴംകുളം പഞ്ചായത്തിലെ വയലയിലാണ് കുഞ്ഞുമോളും ചെറുമക്കളും വാടകയ്ക്കു കഴിയുന്നത്.
തിങ്കളാഴ്ച രാവിലെ എട്ടരയോടെ പഞ്ചായത്ത് ഓഫീസിനു മുന്നില് സമരം തുടങ്ങി. അധികാരികള് കൃത്യമായ ഉറപ്പു നല്കിയെങ്കില് മാത്രമേ സമരം അവസാനിപ്പിക്കുകയുള്ളൂ എന്ന നിലപാടിലാണിവര്. എന്നാല് ലൈഫ് മിഷന്റെ ഇപ്പോഴത്തെ അര്ഹതാ പട്ടികയില് ഇവര് ഉള്പ്പെട്ടിട്ടുണ്ടെന്നും പ്രതിഷേധം പഞ്ചായത്തിനെ അപകീര്ത്തി പ്പെടുത്തുന്നതിനാണന്നും പ്രസിഡന്റ് പി.രാജഗോപാലന് നായര് പറഞ്ഞു.
ഇവര്ക്ക് റേഷന് കാര്ഡ്, ആധാര് എന്നിവ നല്കിയതും ഇപ്പോള് ഏഴംകുളം വയലയില് വാടകയ്ക്ക് താമസിക്കുന്ന ഇവര്ക്ക് ലൈഫ് വേരിഫിക്കേഷനില് വീട് നഷ്ടപ്പെടാതെ ലിസ്റ്റില് പെടുത്താന് സഹായിച്ചതും പഞ്ചായത്താണെന്ന് പ്രസിഡന്റ് പറഞ്ഞു. ഓഗസ്റ്റ് 15 നെ അന്തിമ ലിസ്റ്റ് വരികയുള്ളൂ. ആ മുറയ്ക്ക് വീട് ലഭ്യമാക്കുമെന്നും പ്രസിഡന്റ് പറഞ്ഞു.