ന്യൂഡൽഹി : ശക്തമായ മഴക്കും ഇടിമിന്നലിനും പിന്നാലെ ബിഹാറിലും ജാർഖണ്ഡിലുമായി 18 പേർക്ക് ജീവൻ നഷ്ടമായതായി റിപ്പോർട്ട്. കാലാവസ്ഥാ സാഹചര്യം ഇപ്പോഴും പ്രതികൂലമായതിനാൽ ജനങ്ങൾ അതീവ ജാഗ്രത പാലിക്കണമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ജാർഖണ്ഡിലാണ് ഏറ്റവും കൂടുതൽ മരണങ്ങൾ റിപ്പോർട്ട് ചെയ്തത്. സംസ്ഥാനത്തിന്റെ വിവിധ ഭാഗങ്ങളിലുണ്ടായ ഇടിമിന്നലിൽ 13 പേർ മരിച്ചു. ബിഹാറിൽ അഞ്ച് പേരും ഇടിമിന്നലേറ്റ് മരണപ്പെട്ടതായി അധികൃതർ അറിയിച്ചു. സംഭവങ്ങളിൽ ദുഃഖം രേഖപ്പെടുത്തിയ ബിഹാർ സർക്കാർ, മരിച്ചവരുടെ കുടുംബങ്ങൾക്ക് നാല് ലക്ഷം രൂപ വീതം അടിയന്തര ധനസഹായം പ്രഖ്യാപിച്ചു. ദുരിതബാധിത കുടുംബങ്ങൾക്ക് ആവശ്യമായ എല്ലാ സഹായവും ഉറപ്പാക്കുമെന്നും അധികൃതർ അറിയിച്ചു.
രാജ്യത്തിന്റെ വിവിധ ഭാഗങ്ങളിൽ കാലാവസ്ഥയിൽ പെട്ടെന്നുണ്ടായ മാറ്റമാണ് ശക്തമായ മഴയ്ക്കും ഇടിമിന്നലിനും കാരണമായത്. മഴക്കാലത്തിന്റെ തുടക്കത്തിൽ ഇത്തരം അതിതീവ്ര കാലാവസ്ഥാ സംഭവങ്ങൾ വർധിക്കാൻ സാധ്യതയുണ്ടെന്നാണ് കാലാവസ്ഥാ വിദഗ്ധരുടെ വിലയിരുത്തൽ. ഇടിമിന്നൽ സാധ്യതയുള്ള സാഹചര്യങ്ങളിൽ തുറസായ സ്ഥലങ്ങളിൽ നിൽക്കാതിരിക്കാനും മരച്ചുവട്ടിലും വൈദ്യുത തൂണുകൾക്കും സമീപം അഭയം തേടാതിരിക്കാനും അധികൃതർ നിർദേശിച്ചു. കാലാവസ്ഥാ മുന്നറിയിപ്പുകൾ കൃത്യമായി പാലിക്കുന്നത് ജീവഹാനി ഒഴിവാക്കാൻ നിർണായകമാണെന്നും മുന്നറിയിപ്പിൽ പറയുന്നു.
