ദില്ലി: ദില്ലി മദ്യനയക്കേസില് ചോദ്യം ചെയ്യുന്നതിനായി മുഖ്യമന്ത്രി അരവിന്ദ് കെജ്രിവാളിന് നോട്ടീസ് നല്കി സിബിഐ. 16ാം തീയതി ഞായറാഴ്ച ഹാജരാകാനാണ് കെജ്രിവാളിന് നിര്ദ്ദേശം. കെജ്രിവാളിന് എതിരെ നേരത്തെ മൊഴി ലഭിച്ചിരുന്നു. കെജ്രിവാളിന്റെ സ്റ്റാഫിനെ മാസങ്ങള്ക്ക് മുന്പ് സിബിഐ ചോദ്യം ചെയ്തിരുന്നു. കേസില് നേരത്തെ അറസ്റ്റിലായ മലയാളി വിജയ് നായരുടെ ഫോണ് വഴി കെജ്രിവാള് മദ്യവ്യവസായികളുമായി ചര്ച്ച നടത്തി എന്നാണ് മൊഴി ലഭിച്ചത്. എക്സൈസ് വകുപ്പടക്കം ഭരിക്കുന്ന ഉപമുഖ്യമന്ത്രി മനീഷ് സിസോദിയ അടക്കം 15 പേരെ പ്രതികളാക്കിയാണ് സിബിഐ എഫ്ഐആര് രജിസ്റ്റര് ചെയ്തിട്ടുള്ളത്. മനീഷ് സിസോദിയയാണ് ഒന്നാം പ്രതി.
ദില്ലി സംസ്ഥാനത്തെ ചില്ലറ മദ്യവില്പ്പന മേഖലയിലെ സര്ക്കാര് നിയന്ത്രണങ്ങള് എടുത്ത് കളഞ്ഞ് സ്വകാര്യ മേഖലയ്ക്ക് കടന്നുവരാന് വഴിയൊരുക്കിയതായിരുന്നു ദില്ലി എക്സൈസ് നയം 2021-22. എന്നാല് ഇത് രൂപീകരിക്കുന്നതിലും നടപ്പാക്കിയതിലും അഴിമതി നടന്നുവെന്നാരോപിച്ചാണ് സിബിഐ ഫയല് ചെയ്തിരിക്കുന്ന ഇപ്പോഴത്തെ അഴിമതി കേസ്. ലൈസന്സ് സ്വന്തമാക്കുന്നവര്ക്ക് അനാവശ്യമായ ആനുകൂല്യങ്ങള് നല്കല്, ലൈസന്സ് ഫീസില് ഇളവ്/കുറവ്, കൈക്കൂലി വാങ്ങി എല്-1 ലൈസന്സ് നീട്ടി നല്കല് തുടങ്ങിയ ആരോപണങ്ങളാണ് ഇതില് ഉയരുന്നത്. ഈ നയം രൂപീകരിച്ച് നടപ്പിലാക്കുന്നതിലൂടെ പൊതുപ്രവര്ത്തകര് അടക്കം അനധികൃത ആനുകൂല്യങ്ങള് കൈപറ്റിയെന്നാണ് സിബിഐ പറയുന്നത്.
